O Parque da Xunqueira, en Vilagarcía de Arousa, acolle a mostra organizada pola Asociación para a Defensa Ecolóxica de Galicia (ADEGA) para conmemorar que se cumpren 50 anos da súa fundación.

A mostra recorre, a través de 16 paneis con fotos e imaxes, os principais fitos do movemento ecoloxista galego nas últimas cinco décadas, o colectivo pretende continuar concienciando á poboación sobre a necesidade de coidar o medio no que vivimos e de loitar contra as agresións que sofre.

"ADEGA: 50 anos coidando a terra" é o título da exposición que inclúe a recreación evocadora dos bidóns radioactivos vertidos na Fosa Atlántica entre os anos 1949 e 1982, lembrando a loita en contra e a prohibición definitiva desta actividade, pero tamén evocando os depósitos tóxicos, inflamábeis e corrosivos que no 1987 levaba o cargueiro Casón a varar nas costas de Fisterra.

Ademáis hai textos, imaxes e contidos divulgativos recollidos nas caras dos tótems cúbicos que actúan como soporte, deseñados integramente con materiais reutilizados.

A temática dos paneis vai dende as orixes e formación de ADEGA á importancia de organizarse en defensa do planeta, pasando polo valor do voluntariado activo. Tamén se reserva un espazo para advertir da necesidade da educación ambiental e se tratan as problemáticas máis comúns en Galicia a través dos riscos existentes e das campañas de loita emprendidas polos colectivos ecoloxistas.

Os lumes e a planificación forestal, as verteduras radioactivas no Atlántico, a ameaza continúa das celulosas, os eólicos, as catástrofes mariñas coma as do Casón e o Prestige, a campaña antinuclear de Xove ou a actividade extractiva sen control son algúns dos temas bordados por ADEGA nesta mostra.

Parque da Xunqueira, Vilagarcía de Arousa

Máis eventos

Ver máis eventos