O xornalista Antonio Pampliega presentará o vindeiro venres 12 de decembro o seu libro Cowboys en el infierno na sede da UNED en Pontevedra.
O acto, previsto para as 18:30 horas, poderá ser seguido de forma presencial ou online, en directo ou en diferido.
Durante o encontro, Pampliega compartirá a súa traxectoria como correspondente nalgúns dos conflitos máis determinantes das últimas décadas, entre eles Afganistán, Somalia, Sudán do Sur, Ucraína, Iraq e Siria.
Tamén relatará a experiencia que marcou a súa vida profesional e persoal, o seu secuestro en 2015 a mans de Al Qaeda. Permaneceu 299 días en cativerio.
O acto incluirá unha entrevista conducida por Belén Álvarez, que permitirá profundar nas motivacións do autor, na súa maneira de entender o xornalismo de guerra e no proceso creativo da súa última obra.
Ao finalizar, os asistentes poderán participar nunha quenda de preguntas e acceder a unha firma de exemplares por parte do propio Pampliega.
A actividade está dirixida a estudantes e profesionais de Comunicación, Xornalismo, Historia e Ciencias Políticas; a persoas interesadas nos dereitos humanos, a literatura testemuñal ou a xeopolítica contemporánea; así como a calquera membro do público que desexe achegarse á realidade dos conflitos armados desde unha perspectiva humana, ética e comprometida.
Cowboys en el infierno é unha novela-testemuño que combina recursos literarios de ficción con vivencias e feitos reais.
Con preto de 480 páxinas, a obra sitúa ao lector na cidade siria de Alepo no ano 2012, un dos escenarios máis violentos e devastados do conflito. Alí, dous mozos correspondentes españois (Lucas Corso e El Guaje) traballan como xornalistas 'freelance' en condicións extremas, movéndose entre liñas de combate para documentar a brutalidade da guerra e o sufrimento da poboación civil.
O autor definiu esta novela como "a obra da súa vida", un proxecto co que rende homenaxe aos correspondentes que seguen apostando por un xornalismo valente e necesario, e que pretende situar ao lector na fronteira onde se atopan a información, a supervivencia e a dignidade humana.