'Apaga o candil' inaugura unha nova edición de Sete Falares

Cun espectáculo teatral que reivindica a riqueza da tradición oral e a memoria rural como unha das bases da identidade cultural.

Así comezou este domingo unha nova edición do ciclo Sete Falares.

O auditorio do Pazo da Cultura acolleu a representación da obra Apaga o candil, da compañía galega Contraproducións e dirixida por Cándido Pazó.

Apaga o candil lembra teatralmente a figura de Carlos O Xestal, folclorista, contador de historias e humorista galego de gran popularidade nos anos 60 e morto nos 90.

Protagonizada por Avelino González e Toni Salgado, esta obra establece un dinámico e ameno reto dialéctico entre O Xestal e a propia morte, entrelazando os episodios máis significativos da vida con algúns das súas máis divertidos contos.

Tras esta inauguración, os narradores e narradoras convidados a este novo Sete Falares tomarán a palabra ao longo dos próximos días.

Este luns, ás 18:30 horas, Celso Fernández Sanmartín, unha figura destacada do relato galego, ofrecerá a súa sesión narrativa na residencia de maiores de Campolongo.

Pola súa banda, o actor e director Carlos Rebolo ofrecerá unha sesión de humor baseada na súa propia biografía ás 20:30 horas no cruceiro de Santa María.

E xa o mércores, ás 20:30 horas, os xardíns de Marescot recibirán a Ángeles Goás, unha das representantes da nova fornada de narradores galegos.