O Liceo Casino de Pontevedra presentou a oferta cultural que desenvolverá durante a próxima semana.
Dentro da programación combina exposicións de arte e actividades musicais pensadas para todos os públicos en plena antesala do Nadal.
Do 11 ao 24 de decembro, a Sala de Exposicións acollerá a mostra 'Dornas y otros paisajes', unha proposta artística do pintor Enrique Cervera-Mercadillo centrada na representación da paisaxe e as súas atmosferas.
A inauguración terá lugar o xoves 11 de decembro, ás 20:00 horas, e a exposición poderá visitarse de luns a sábado, en horario de 10:00 a 22:00 horas.
A música chegará o sábado 13 de decembro, ás 19:00 horas, co Concerto de Nadal ofrecido polos coros I.E.S. A Xunqueira I, Vinderel e Voces Brancas da Xunqueira.
A cita reunirá no Salón Nobre unha selección de obras propias desta tempada, interpretadas por formacións corais con destacada traxectoria no ámbito educativo e cultural.
Pola súa banda, a Escola de Música Gaia ofrecerá o seu tradicional Concerto de Nadal o luns 15 de decembro, ás 18:00 horas, no que o alumnado do centro interpretará un repertorio de pezas do Nadal.
A programación está aberta a todos os públicos e o acceso será libre ata completar a capacidade do espazo.