Xa hai datas para a nova edición do Atlantic Fest. E non será unha máis. O festival de Vilagarcía de Arousa cumpre dez anos e promete celebralo ao grande. Será entre os días 17 e 19 de xullo, como é habitual, na Praia da Concha.
A organización avanza que as primeiras confirmacións de artistas anunciaranse o vindeiro luns 1 de decembro e tres días despois, o xoves 4 ás 09:00 horas, arrancará a venda de entradas cun prezo especial dispoñible só durante as primeiras 24 horas.
O recinto principal do festival, situado na Praia da Concha, abrirá as súas portas o venres 17 e o sábado 18, a poucos metros do mar e do centro da cidade.
Alí situarase o escenario Galicia Calidade, onde co patrocinio da Xunta de Galicia e do ciclo Concertos do Xacobeo, pasarán os artistas máis destacados do festival.
Ademais, no escenario Vibra Mahou haberá as mellores sesións de DJ que animarán os momentos de espera entre actuacións e manterán o ambiente festivo en todo momento.
O domingo 19 de xullo a música de Atlantic Fest trasladarase ao escenario Vibra Mahou, situado nas rúas de Vilagarcía de Arousa, onde haberá actuacións ao mediodía.
O Atlantic Fest ofrecerá tamén unha zona de acampada e glamping no Cámping Río Ulla, con transporte gratuíto que conecta a estación de tren, o recinto e a zona de acampada, facilitando a mobilidade de todos os asistentes.
Desde a súa primeira edición, Atlantic Fest caracterizouse por ofrecer unha experiencia auténtica e festiva de música en directo, combinando actuacións de calidade cun ambiente familiar e de gran conexión entre os seus asistentes.
O festival, destacan os seus responsables, consolidouse como un espazo onde o público e a música son os protagonistas, onde todos forman parte dunha gran comunidade.