O Festival Clasclás inaugurou na noite do sábado a súa novena edición cunha das grandes obras do repertorio sacro occidental, a Paixón segundo San Xoán de Johann Sebastian Bach.
O concerto, celebrado no Auditorio Municipal de Vilagarcía de Arousa, marcou o inicio dunha programación que reunirá once citas musicais até o próximo 27 de xuño baixo a lema "Paixón".
A interpretación correu a cargo da Orquestra Sinfónica de Galicia e o seu Coro, formación residente do certame nesta edición, baixo a dirección musical de Carlos Mena.
O coro estivo dirixido por Javier Fajardo e o elenco de solistas estivo integrado pola soprano Jone Martínez, o propio Carlos Mena como contratenor, o tenor Juan Sancho no papel do Evanxelista, o barítono Josep-Ramon Olivé e o baixo José Coca como Xesús.
A obra de Bach, considerada unha dos cumes da música relixiosa barroca, centrou a primeira velada dun festival que este ano articula toda a súa programación en torno ao concepto da paixón, tanto desde unha perspectiva artística como emocional.
O Bambú Ensemble será o seguinte
A programación continuará este domingo ás 21.00 horas no Salón García de Vilagarcía co concerto Paixón e mocidade, protagonizado polo Bambú Ensemble, unha formación xurdida na contorna da Joven Orquesta Nacional de España (JONDE) e da European Union Youth Orchestra (EUYO).
O grupo ofrecerá un programa para octeto de corda que inclúe o Octeto para cordas, opus 5 de Reinhold Glière, unha das primeiras obras camerísticas do compositor ucraíno e representativa da tradición sinfónica eslava de comezos do século XX. O repertorio tamén incorporará as Dúas pezas para octeto de cordas, opus 11 de Dmitri Shostakóvich, compostas en 1925 e consideradas unha mostra temperá dos trazos que definirían posteriormente a linguaxe creativa do autor ruso.
A actuación completarase coa Serenata para cordas do compositor español Javier Martínez Campos, representante dunha nova xeración de creadores que combina a actividade interpretativa coa composición tras unha formación desenvolvida en institucións de España, Alemaña e os Países Baixos.
