A décima edición do programa de Residencias Paraíso, impulsado polo Colectivo RPM, volverá ter presenza en Pontevedra. Será da man da Bienal de Artes Vivas.
O Museo de Pontevedra e, en concreto, o convento de Santa Clara acollerá a residencia do bailarín e coreógrafo Fran Martínez. O artista vigués desenvolverá o proxecto Transfixión.
Transfixión é unha peza sobre o facer e o misticismo de baixa intensidade.
A través do ir e vir entre o dentro, escuro e introspectivo e o fóra, visible e indescifrable, Martínez explora a espesura do movemento e da percepción, xerando un espazo onde corpo, tempo e sensación se entrelazan nunha experiencia sensorial e poética.
Tras darlle forma á súa obra nesta residencia, Fran Martínez formará parte da programación da Bienal de Artes Vivas de Pontevedra, que se celebrará entre os días 2 e 12 de xullo.
Reunirá, en total, máis de vinte artistas de danza, música, circo e outras artes performativas.
A residencia enmárcase no obxectivo da Deputación de Pontevedra de converter Santa Clara nun espazo de produción artística, pensamento e experimentación cultural.
Queren que sexa un espazo aberto á cidadanía, co impulso de iniciativas que sexan compatibles co seu proceso de rehabilitación.
