Balance "moi satisfactorio" no ecuador do Culturgal

O Recinto Feiral de Pontevedra é todo un fervedoiro de actividade durante a fin de semana coa Feira das Culturas Galegas, Culturgal.

Tamén o é de asistencia, e é que no ecuador da feira o balance é xa "moi satisfactorio", asegura o seu director, Camilo Franco.

"A xente está respondendo á oferta de Culturgal", afirma tras confirmar que ao mediodía deste sábado eran xa 2.000 as persoas que pasaran polo evento que reúne a representantes da cultura galega.

Todo iso á espera da alta asistencia que se esperaba para a tarde do sábado e tamén para a mañá do domingo, tradicionalmente os momentos cunha maior asistencia de público.

A oferta de Culturgal anima desde logo a iso.

Entre os eventos destacados deste sábado a programación propuña un adianto da nova obra de Chévere, diversa programación infantil, o regreso á música adulta de Magín Blanco, clubs de lectura, ao escritor Suso de Toro ou o espectáculo Moito Conto, con Touriñán.

En total durante os tres días de Culturgal expóñense preto de 225 actividades con máis dun centenar de expositores.

Todo un espacaparate para o talento galego e un adianto ao que proporá a tempada cultural durante o ano 2026.