O Liceo Casino de Pontevedra será o escenario o vindeiro sábado 4 de outubro, ás 19:00 horas, da inauguración de "Ecos del Tiempo", unha exposición que fusiona arte, memoria e solidariedade da man da artista Berta Lima.
A mostra presenta unha colección de obras pictóricas que dialogan directamente con dúas publicacións da propia artista: "Recuerdos", concibido como legado familiar para os seus netos, e "Milagros", creado en homenaxe a súa nai.
Estes universos literarios e íntimos trasládanse ao lenzo, convidando os visitantes a mergullarse nun percorrido pola memoria persoal e os vínculos afectivos.
A dimensión solidaria constitúe un dos alicerces fundamentais desta proposta cultural.
Lima decidiu doar o 10% dos ingresos obtidos pola venda dos seus cadros a Aldeas Infantís, organización coa que mantén unha colaboración en Redondela e que se dedica a proporcionar fogar, educación e oportunidades a menores en situación de vulnerabilidade.
"Para min, a arte é ponte e é futuro. Poder unilo cun proxecto que axuda aos máis pequenos emocióname profundamente", declara a artista sobre esta iniciativa.
O acto inaugural contará coa presenza de Berta Lima e dirixirase tanto aos socios do Liceo Casino como ao público xeral interesado en participar desta experiencia cultural.
A organización solicita confirmación previa de asistencia a través do correo [email protected] para garantir unha axeitada organización do aforamento e do servizo de catering.