O emblemático cadro A derradeira leición do mestre, obra de Alfonso Daniel Rodríguez Castelao, comezou este luns a súa viaxe cara a Pontevedra desde Bos Aires, onde permanece desde hai décadas custodiado polo Centro Galicia.
A peza, considerada unha das creacións máis representativas da arte e do pensamento galeguista, poderá visitarse no Museo de Pontevedra entre o 25 de xuño e o 27 de setembro.
O vicepresidente da Deputación de Pontevedra, Rafa Domínguez, asistiu ao acto de retirada e embalaxe da pintura na sede da entidade da diáspora galega na capital arxentina. A obra foi preparada para o seu traslado seguindo os protocolos internacionais establecidos para o transporte de bens artísticos e contará coa supervisión permanente dun representante do Centro Galicia durante todo o percorrido.
Durante o acto, Domínguez destacou o valor simbólico do lenzo e a relevancia da súa chegada temporal a Galicia. Segundo sinalou, a exposición permitirá que a obra dialogue por primeira vez coa colección do Museo de Pontevedra, institución que conserva unha parte fundamental do legado de Castelao.
O vicepresidente tamén puxo en valor o entendemento alcanzado entre a Deputación e o Centro Galicia de Bos Aires para facer realidade un proxecto que cualificou como un fito cultural e emocional para a sociedade galega, tanto dentro como fóra do país. Neste sentido, subliñou que a exhibición da pintura reforza os vínculos entre Galicia e a súa emigración, ao tempo que reivindica a figura de Castelao como un dos grandes referentes da identidade colectiva galega.
A obra viaxará inicialmente por vía aérea ata Alemaña e continuará despois por estrada ata Galicia, onde está prevista a súa chegada o vindeiro 17 de xuño, poucos días antes da apertura da mostra.
Pintada en 1945, A derradeira leición do mestre constitúe unha das pezas máis coñecidas de Castelao. O óleo, de dous metros de altura, foi realizado para o Centro Orensano de Bos Aires, entidade vinculada á publicación de Sempre en Galiza. A súa presentación coincidiu co noveno aniversario do fusilamento de Alexandre Bóveda, amigo persoal do artista e unha das figuras máis destacadas do galeguismo histórico.
A pintura recrea unha das estampas de Galiza mártir e mostra o corpo sen vida dun represaliado ante a mirada de dous nenos nunha paisaxe galega. A figura representada identifícase habitualmente con Bóveda, converténdose nun símbolo da represión franquista e nunha homenaxe ás persoas que loitaron pola liberdade, a democracia e a xustiza.
Desde 1979, a obra forma parte dos fondos do Centro Galicia de Bos Aires, herdeiro do movemento asociativo da emigración galega na Arxentina. A súa cesión temporal coincide coa conmemoración de varias efemérides relacionadas coa Guerra Civil e co galeguismo histórico, entre elas o 90 aniversario do plebiscito do Estatuto de Autonomía de Galicia de 1936 e do asasinato de Alexandre Bóveda.
A exposición completarase con diversos materiais documentais e artísticos relacionados coa creación da obra, entre eles o debuxo orixinal que lle serviu de inspiración a Castelao, manuscritos e edicións históricas de Sempre en Galiza, así como fotografías da súa presentación pública en Bos Aires.
Ademais, o Museo de Pontevedra organizará durante os meses de verán un amplo programa de actividades complementarias, con visitas guiadas, obradoiros infantís, concertos, conferencias e un seminario dedicado á análise histórica e artística desta peza fundamental para comprender a Galicia do século XX.