O canto colectivo de centos de voces abre o telón das Festas da Peregrina

O centro histórico de Pontevedra vibrou coa música e o canto coral de centenares de persoas que participaron na novena edición de Aquí Cántase, o evento que marca tradicionalmente o inicio das Festas da Peregrina e que, un ano máis, conseguiu reunir a veciños e visitantes en catro puntos da cidade.

O percorrido comezou ás 21:00 horas na praza de Curros Enríquez, onde centos de persoas xa agardaban coas follas das cantigas na man, distribuídas pola organización para facilitar a participación de todos os asistentes.

Desde alí, a multitude foi avanzando polas rúas do centro histórico, pasando pola praza do Teucro, o Teatro Principal e rematando na praza de Santa María.

En cada unha das paradas interpretáronse cinco cantigas do repertorio total de 20 pezas, entre as que destacaron cinco novas incorporacións para esta edición.

Roi Xesteira, quen asumiu a dirección do evento en substitución do seu irmán Anxo, foi o encargado de guiar aos participantes, marcando o ritmo e as entradas das diferentes voces.

A Treboada do Baixo Miño acompañou os cantantes durante todo o percorrido, animando o ambiente e chamando a atención dos transeúntes que, en moitos casos, acabaron sumándose espontaneamente á festa.

Organizado pola asociación cultural Maravallada, Aquí Cántase naceu en 2017 inspirado polo éxito dos Cantos de Taberna, pero coa intención de crear un evento máis amplo e inclusivo.

Desde entón, consolidouse como unha das citas máis esperadas do calendario festivo pontevedrés.