Intenso será o arranque de decembro en Pontevedra. Dous das directoras máis aclamadas do cine español, Carla Simón e Alauda Ruiz de Azúa, presentarán na Boa Vila as súas últimas películas, Romería e Los domingos, dúas das películas máis nomeadas aos Feroz 2026.
Ambas as cineastas participarán nun coloquio co público pontevedrés, dentro das actividades previas aos Premios Feroz, no Teatro Principal.
Carla Simón, que o martes 2 de decembro recibirá o I Premio de Cinematografía do festival Novos Cinemas, compartirá Romería cos espectadores ese mesmo día, ás sete da tarde. Farao acompañada da súa produtora habitual, María Zamora.
A cinta, que xunto con Verano 1993 e Alcarràs pecha a triloxía da memoria familiar da directora, concursou na sección oficial do pasado Festival de Cannes.
Ofrece un retrato íntimo e familiar que, á vez, o é de toda unha xeración. Marina, adoptada desde moi pequena, viaxa a Vigo para atoparse por primeira vez cos parentes do seu pai biolóxico, descubrindo así as feridas duns e outros.
Romería conseguiu seis candidaturas aos Premios Feroz 2026: película dramática, dirección, guion dunha película, música orixinal, tráiler e cartel.
Ao día seguinte, o mércores 3 de decembro, tamén ás 19:00 horas, será Alauda Ruiz de Azúa quen presente a cinta con máis candidaturas nos Feroz 2026, Los domingos.
A realizadora desvelará os segredos da súa última longametraxe, cunha enorme capacidade para crear debate e para facer reflexionar ao espectador.
Este drama, que no pasado Festival de San Sebastián alzouse coa Cuncha de Ouro e o Premio Feroz Zinemaldia (entre outros), conta a historia de Ainara, unha moza idealista e brillante a piques de empezar a súa etapa universitaria.
Manifesta á súa familia que se expón abrazar a vida de monxa de clausura. Unha noticia que sorprende aos seus familiares, provocando un abismo e unha proba de lume para todos.
O filme aspira a nove premios nos Feroz 2026: película dramática, dirección, guion, cartel, tráiler e para catro dos seus intérpretes, Patricia López Arnaiz, Blanca Soroa, Miguel Garcés e Nagore Aramburu.
As entradas a todas as sesións son gratuítas previa retirada de localidades na oficina de Turismo da Praza de España de Pontevedra, desde sete días antes de cada actividade e até completar o aforamento. Haberá un máximo de dúas entradas por persoa.