Tan positiva resultou a parada de 'Menú da noite' en Pontevedra en 2016, que Summum Teatro apostou por repetir este domingo a fórmula.
O espectáculo protagonizado polo cómico Carlos Blanco e o debuxante Luís Davila foi este domingo, por partida dobre, a terceira cita do ciclo teatral que se celebra no Pazo da Cultura.
O público pontevedrés acudiu en bo número a gozar da mestura de enxeño e arte que propón o dúo, nunha viaxe a Broadway pero "cos sachos", tal e como reza a promoción do espectáculo, e algunha novidade con respecto ao pasado ano.
Gargalladas apoiadas na oratoria de Blanco e na imaxe que achega o Davila cos seus debuxos improvisados, cunha banda sonora con música de Budiño e Kepa Junquera.
A próxima cita do ciclo Summum Teatro terá lugar o 28 de outubro con 'Nagare', do Circle of Trust-Logela Multimedia. É un espectáculo que combina danza e tecnoloxía.