Aquelas persoas que estean pensando en escribir as cartas aos Reis Magos ou Papá Noel e aquelas que simplemente queiran agasallar cultura estas festas teñen no Pazo da Cultura e o Teatro Principal de Pontevedra varias ideas nas que inspirarse.
Así, entre o 20 de decembro e o 30 de xaneiro, os dous recintos culturais pontevedreses acollerán diversas propostas musicais que xa teñen entradas á venda en Ataquilla.com e poden ser un agasallo de Nadal diferente.
Desde o Concello de Pontevedra lembran que poden ser "unha experiencia para compartir tempo e gozar da música".
A primeira cita será o 20 de decembro ás 21.00 horas no auditorio do Pazo da Cultura, un concerto de Carlos Núñez da súa xira ‘30 aniversario de A Irmandade das Estrelas’.
O músico galego máis internacional celebra o 30 aniversario do disco que revolucionou a música celta, converténdose nun fito da cultura galega.
A seguinte parada será o 1 de xaneiro ás 19.30 horas no auditorio do Pazo da Cultura, o Concerto de Aninovo da Orquestra Sinfónica de Pontevedra.
A Orquestra Sinfónica de Pontevedra achega nesta ocasión como proposta unha viaxe musica que comeza en Galicia, cunha primeira parte de homenaxe á figura de Prudencio Romo e Los Tamara nas voces de Paco Lodeiro e César Romero con arranxos de Manuel Otero Paino.
Rematará coa parte máis tradicional: a música dos Strauss e o Ballet de Galicia.
O 9 de xaneiro a cita será ás 21.00 horas no auditorio do Pazo da Cultura, co espectáculo de danza ‘O Crebanoces’, unha proposta do Ballet Clásico Internacional con música de P. Tchaikovsky.
O Ballet Clásico Internacional é unha proposta artística de Tatiana Solovieva Producións, que leva 30 anos compartindo os mellores espectáculos con España, respectando e honrando a fermosa tradición do ballet clásico.
O 11 de xaneiro ás 19.00 horas a cita será no auditorio do Pazo da Cultura, con Café Quijano e o seu ‘Miami Tour 1990’.
'Miami 1990' é o último traballo de Café Quijano, unha fresca continuación do son quijano máis auténtico, non exento de certos fragmentos sonoros dos anos 90.
A última cita desta proposta de agasallos será o 30 de xaneiro ás 21.00 horas no Teatro Principal.
Trátase da presentación do novo disco Davide Salvado. Neste caso, as entradas sairán á venda próximamente.