A cidade de Pontevedra converterase, entre o 25 e o 28 de xuño, no punto de encontro de referencia para os amantes do noveno arte coa celebración dunha nova entrega de BDra Gráfica.
O concelleiro de Cultura, Demetrio Gómez, puxo en valor o potencial do municipio para impulsar iniciativas desta envergadura e a implicación das librerías co proxecto.
Pola súa banda, o director do festival, o ilustrador Kiko da Silva, promotor do evento, incidiu no valor de deseñar un modelo de certame diferente, orientado ao público lector e capaz de atraer un turismo cultural que xa agarda con interese as datas desde puntos como Madrid, Barcelona ou o País Vasco.
Unha das bases centrais desta edición radica na firme aposta polas exposicións de láminas orixinais, unha decisión que Kiko da Silva defende con enerxía no contexto tecnolóxico actual: "Ver orixinais na época das intelixencias artificiais é un valor engadido. Ver que existen os orixinais feitos a man é un plus".
O festival fuxe deliberadamente do concepto de feira illada e distribúe cinco grandes mostras en distintos espazos emblemáticos da vila:
Fundación Manuel Moldes: Acollerá unha homenaxe á traxectoria do galego Julio Das Pastoras, autor do cartaz desta edición. Trátase dun autor coruñés que iniciou a súa andaina xunto a Miguelanxo Prado en Barcelona, traballou no mercado francés e actualmente realiza ilustracións de gran formato para as xigantes estadounidenses Marvel e DC. A mostra recollerá case 60 pezas orixinais de dimensións considerables.
Casa das Campás: Amosará a obra de Kim, histórico debuxante da revista El Jueves, creador de Martínez el Facha, e gañador do Premio Nacional de Cómic con novelas gráficas de corte histórico como El arte de volar.
Liceo Casino: Albergará as ilustracións de Vida toda, un traballo de Ángel de la Calle, Jordi Pérez e Ana Ruiz que aborda a temática da ditadura militar arxentina.
Pazo da Cultura: Dividirase en dúas propostas internacionais de relevo. Por unha banda, os debuxos en tinta chinesa e formato A3 de Homs, coñecido pola adaptación ao cómic da saga Millennium. Pola outra, a mostra exclusiva A balada de Hugo Pratt, comisariada por Paco Linares Micó, que supón un percorrido polo universo do creador de Corto Maltés ante o seu próximo aniversario.
A praza da Ferrería será o punto central das actividades comerciais e promocionais con 14 casetas de librarías e editoriais, nun espazo que estará presidido polo tradicional Obélix inchable.
Arredor de trinta autores darán cita no festival para asinar os seus traballos. Entre os nomes máis destacados atópase Emma Ríos, candidata a mellor autora polo seu traballo en Anzuelo, e José Luis Munuera, o primeiro profesional español en debuxar o célebre personaxe de Spirou, que ofrecerá unha clase maxistral sobre como adaptar textos literarios á linguaxe visual.
O eido académico tamén estará presente a través dunha conferencia do catedrático Álvaro Pons, da Universidad de Valencia, que analizará o papel didáctico do cómic nas aulas.
Xunto a eles participarán creadores como Verónica Álvarez, Jordi Sempere ou Mario Trigo, que presentará un volume dedicado á protección do lobo, compaxinando a súa presenza con firmas emerxentes como Mara Méndez, Teresa Ferreiro ou Silvia Fernández.
Grazas ás sesións de revisión de portafolios desenvolvidas no ano anterior, tres autores noveis, Damián Gómez, Iago Fernández e Silvia Fernández, lograron asinar contratos laborais con editoriais galegas e presentarán as súas obras editadas neste marco.
Segundo suliñou Da Silva, o sector editorial xeralista está a mudar e xa incorpora seccións estables de banda deseñada de produción propia, superando a etapa na que o mercado dependía case en exclusiva das traducións.
O venres 26 de xuño, o programa Territorio 9 de Radio 3 (RNE), especializado en cultura gráfica, emitirá un monográfico en directo desde a carpa da Ferrería.
A oferta lúdica completarase con tres proxeccións cinematográficas vinculadas ás viñetas: o documental El desastre es mi musa (sobre Art Spiegelman, autor de Maus) na Casa das Campás; a cinta de animación en 3D Astérix: A residencia dos deuses na Fundación Moldes; e o filme Persépolis, de Marjane Satrapi, nos xardíns da Santiña.
Demetrio Gómez resumiu o espírito de crecemento de BDra Gráfica cunha reflexión sobre as potencialidades do concello: "Esta cidade pode sacar os proxectos máis grandes, e é referencia un ano máis para que os autores queiran vir".
O calendario detallado con todos os horarios e actividades poderá consultarse a partir do vindeiro luns na páxina web oficial do festival.