A Deputación de Pontevedra leva o venres 15 de agosto, día festivo, dúas propostas escénicas á provincia dentro da segunda edición do circuíto +Escénicas.
En Cuntis, a Praza de Ferrol acollerá ás 17:30 horas "4.0", da creadora Sue Moreno.
A proposta mestura técnicas aéreas circenses, cancións e teatro físico sobre unha estrutura de seis metros de altura, e aborda, cun ton humorístico, terno e ás veces absurdo, as dificultades da conciliación no día a día dunha muller, entre traballo, vida e maternidade.
A actividade cultural tamén chega a Cerdedo‑Cotobade, onde a Praza da Chan de Carballedo recibirá ás 19:00 horas "Un baile ceibe", de Fran Sieira Compañía de Danza.
A peza contemporánea indaga na presenza do xénero en diversos ámbitos e reflexiona sobre os estereotipos sociais, ao tempo que recupera e dialoga co baile tradicional para construír novas maneiras de entender o corpo e o movemento.
+Escénicas, lembra a Deputación, responde á demanda do sector profesional e contén, nesta segunda edición, unha programación reforzada cun orzamento de 195.000 euros con 136 funcións ata marzo de 2026.