O vindeiro xoves 23 de outubro, ás 20:30 horas, o Auditorio do Pazo da Cultura acollerá o segundo concerto da tempada da Sociedade Filharmónica de Pontevedra. Nesta ocasión, o escenario estará a cargo da Orquestra Clásica de Vigo, todo un referente musical en Galicia.
Fundada en 1984 polo seu actual director, Manuel Álvarez-Nava, a Orquestra Clásica de Vigo celebra xa catro décadas de historia.
Con máis de 500 obras interpretadas, esta formación demostrou un compromiso constante coa diversidade musical: desde grandes obras clásicas até propostas innovadoras que combinan danza, cine en directo, bandas sonoras e música contemporánea. Unha orquestra con carácter, que aposta por novos formatos e polo diálogo entre disciplinas e estilos.
Nesta velada especial, baixo a batuta do propio Álvarez-Nava, a orquestra interpretará dúas xoias do repertorio de Ludwig van Beethoven: o Concerto para piano núm. 3, op. 37, e a impoñente Sinfonía núm. 5, op. 67.
O concerto contará coa participación do pianista Severino Ortiz Rey, natural de Pontevedra, quen será o solista no Concerto para piano.
Cunha sólida traxectoria docente, impartiu clases en diversos conservatorios europeos grazas ao programa Erasmus, e desde 2004 é pianista acompañante no Conservatorio Superior de Música de Vigo.
Os socios da Sociedade Filharmónica poderán acceder ao auditorio mostrando o seu carné de tempada.
Para o público xeral, as entradas estarán dispoñibles o mesmo día do concerto, a partir das 19:30 horas, no vestíbulo do Auditorio.