José López Campos, conselleiro de Cultura, Lingua e Xuventude, trasladou este luns en Pontevedra os detalles do cambio normativo que afectará á xestión do Camiño de Santiago e do patrimonio cultural galego.
Este encontro pecha a ronda de reunións cos concellos das principais provincias galegas (Ourense, A Coruña, Lugo e Pontevedra), nas que o titular de Cultura explicou persoalmente os fundamentos da reforma ante alcaldes, alcaldesas e técnicos municipais.
O cambio lexislativo, previsto na Lei de acompañamento dos Orzamentos, responde á singularidade de Galicia como territorio cun número excepcional de bens patrimoniais declarados (máis de 80.000), o que, segundo López Campos, provoca unha carga administrativa e burocrática da Xunta, que dificultou a protección real dalgúns bens.
"A nosa intención é que, en vez de que a protección actúe como freo, sexa ferramenta para poñer en valor o patrimonio", asegurou o conselleiro a preguntas de PontevedraViva.
A reforma supón unha repartición de competencias: os bens de maior valor singular seguirán sendo xestionados directamente pola Xunta, mentres que aqueles cun menor grao de protección pasarán a competencia municipal.
Este cambio permitirá que os propios concellos poidan autorizar licenzas e tomar decisións sobre actuacións no seu patrimonio, sen ter que esperar autorización autonómica, sempre dentro do marco legal establecido.
Para o Camiño de Santiago, e concretamente para o Camiño Portugués, López Campos detallou que os concellos terán competencias totais sobre o "territorio histórico" e, no caso da propia traza urbana do Camiño, as cidades con máis de 50.000 habitantes na provincia (Vigo e Pontevedra) poderán xestionar directamente as autorizacións urbanísticas vencelladas á ruta xacobea.
Destacou que isto axilizará trámites, reducirá atrasos e facilitará a posta en valor dos bens, ao tempo que acabarán percepcións negativas sobre o patrimonio.
Esta medida foi compartida nun encontro na Delegación Territorial da Xunta en Pontevedra, onde participaron representantes municipais de toda a provincia, incluíndo alcaldes como Jorge Cubela (Cerdedo-Cotobade), Xosé Manuel Fernández Abraldes (Barro), Andrés Díaz (Ponte Caldelas) ou Gonzalo Durán (Vilanova de Arousa), entre outros.
López Campos concluíu que coa reforma, "impulsamos a colaboración cos concellos, desburocratizamos a protección patrimonial e garantimos unha maior eficiencia na conservación e promoción do noso legado cultural e do Camiño de Santiago".
