O campus de Pontevedra da Universidade de Vigo organiza o venres 20 de marzo o seu Concerto de Primavera no Teatro Principal.
O grupo de música tradicional Tres Pesos encabeza un programa que comezará ás 20:30 horas e no que tamén intervirán as formacións de música e baile da institución académica.
A proposta central corre a cargo de Felisa Segade, Xosé Antón Ferreira e Xoán Porto, integrantes de Tres Pesos.
A formación presentará o seu terceiro disco, Cantares e contares, un traballo baseado na recolleita de pezas da tradición oral do rural galego.
Durante a actuación, o trío contará coa colaboración do grupo de baile tradicional do campus, composto por once persoas baixo a dirección de Montse Rivera, e do grupo de música tradicional, dirixido por Marina Fernández, que achegará gaitas, percusión, zanfona e acordeón.
Antes do inicio no interior do teatro, ás 20:00 horas, o exterior do edificio acollerá un encontro musical previo se a meteoroloxía o permite.
Neste acto participarán os alumnos e alumnas da aula permanente de música tradicional do campus, que dirixe Suso Vaamonde, xunto con integrantes da escola de música e baile tradicional do Concello da Serra de Outes.
Segundo explica Luis Torres, director da Área Adxunta á Vicerreitoría, esta iniciativa busca integrar aos grupos formativos do campus en espectáculos con artistas consolidados.
O evento, promovido pola Vicerreitoría coa colaboración do Concello de Pontevedra, é de acceso gratuíto para toda a cidadanía.
As persoas interesadas poden recoller as invitacións ata o mércores 18 de marzo nas conserxerías das facultades, escolas e na sede da Vicerreitoría.
No caso de quedar prazas dispoñibles, estas poderán retirarse o propio día do concerto na Casa das Campás ata as 19:30 horas.