A praza da Ferrería encheuse para gozar da inconfundible voz da cantante de Detroit, Janiva Magness, que regresaba ao Festival Internacional de Jazz e Blues sete anos despois da súa última actuación. A cantante volveu entusiasmar ao público coa súa elegancia e o seu poder sobre o escenario.
Janiva Magness deixa paso a outra actuación que interesará a todos os afeccionados ao jazz porque na noite deste venres 17, ás 22.30 horas, Terri Lyne Carrington sentará tras a batería do escenario da Ferrería para ofrecer toda a súa versatilidade artística. Esta muller é unha das máis destacadas especialistas neste instrumento no universo do jazz pero declárase amante doutros estilos como o reggae, o funk e mesmo o heavy metal.
O seu último álbum, 'Money Jungle: Provocative in blue' editado en 2013, obtivo un Grammy, o primeiro que se entrega a unha muller na categoría de mellor disco de jazz instrumental.