Tras o éxito dos concertos de Camerata Arven e Catro Cores a principios de semana, o programa Híbridas en Santa Clara ten preparada unha nova oferta cultural para os próximos días.
A danza estrearase nesta programación este sábado 16 de abril, a partir das 20.00 horas, coa compañía de danza contemporánea Kirenia Danza, que porá en escea Primeiro a vida!.
É unha peza que é un eloxio aos coidados xa que todas as persoas son vulnerables e poden precisar coidar e ser coidadas. Kirenia Danza é partidaria da intervención en temas e cuestións que van máis aló dos clásicos da danza como os retos emerxentes da sociedade actual.
O domingo 17 de abril, ás 13.30 horas, retornará á igrexa de Santa Clara o ciclo Sons no Retablo que pretende recordar o lugar que foi escenario das músicas de coros, agrupacións de música sacra e outros sons propios do pasado.
Nesta ocasión será coa interpretación de Abraham Cupeiro que recuperará “Os sons esquecidos”.
Abraham Cupeiro é un artista que se caracteriza pola recuperación de instrumentos perdidos no tempo para empregalos para crear novas sonoridades e usalos en músicas alleas a eles.
A entrada para todas as actividades será de balde ata chegar ao límite do aforo. É dicir, non será precisa ningunha reserva para ningunha das actuacións.