Tras o anuncio de Café Quijano como primeiro artista da Festa do Mar de Poio 2026, o Concello desvelou este venres a segunda confirmación da programación musical.
Trátase de Depol, cantante e compositor madrileño que se consolidou nos últimos anos como unha das grandes revelacións do pop nacional.
O concerto, de entrada gratuíta, será o venres 21 de agosto ás 23:30 na Praza da Chousa de Combarro.
Entre os seus temas máis coñecidos figuran Quien diría, con máis de 66 millóns de reproducións e triplo disco de platino; Qué bonita, que supera os 42 millóns de escoitas e logrou o dobre disco de platino; e Ibiza, tamén dobre disco de platino tras pasar os 38 millóns de reproducións en Spotify.
Ademais, o artista alcanzou o número un de LOS40 con Ibiza e Te confieso e suma máis de 1,2 millóns de oíntes mensuais en Spotify.
O concerto de Depol celebrarase un día antes do xa anunciado de Café Quijano, previsto para o sábado 22 de agosto, completando así dúas das principais citas musicais dunha Festa do Mar que volverá converter Combarro nun dos grandes focos do verán galego.
Desde o goberno local apuntan que a programación completa do evento, que se celebrará do 20 ao 23 de agosto, darase a coñecer nos próximos días.
O Concello mantén a súa aposta por combinar música, gastronomía e actividades culturais para pór en valor o patrimonio mariñeiro de Poio e o papel estratéxico do sector marítimo no municipio.
Engade Pontevedra Viva como fonte preferida de Google de balde
Mantente informado coas últimas noticias de actualidade.