Nin a choiva logrou embazar unha edición "espectacular e de primeiro nivel" da Festa do Mar, que este ano brillou con luz propia, segundo a valoración que fai o Concello de Poio.
Durante catro intensos días, miles de persoas participaron nunha celebración que combinou tradición, cultura, música e sabor, consolidando así unha aposta firme pola identidade mariñeira do municipio.
O evento, que "xa se converteu nunha cita imprescindible do calendario galego", puxo o foco na calidade da súa programación e no valor do mar como motor económico, social e cultural.
Así o destacou o alcalde, Ángel Moldes, quen non dubidou en cualificar a oferta como "moi potente e cun ambiente extraordinario" a pesar do tempo.
Un dos grandes atractivos volveu ser a carpa-museo, auténtico corazón cultural do evento.
Alí, veciños e visitantes puideron mergullarse no mundo mariñeiro a través de exposicións fotográficas, embarcacións tradicionais, maquetas, útiles de pesca e, como novidade, unha sección dedicada ao salvamento marítimo e ás telecomunicacións.
O "Cine do Mar" completou esta experiencia única, ofrecendo unha visión máis íntima da vida xunto ao océano.
No plano musical, a festa foi "un auténtico festival ao aire libre".
Artistas como Coti, Natalia, Miss Caffeina, La Ocaband, Grupo América e Pop Rock Symphony Fusion fixeron vibrar A Chousa mesmo baixo a choiva, mentres que os DJ Jorge Álvarez e Arroww animaron as noites máis xuvenís.
A Mostra da Canción Mariñeira e o Encontro de Embarcacións Tradicionais, organizado polo Club Mariño A Reiboa, volveron destacar pola súa calidade e afluencia, "reafirmando o compromiso de Poio coas súas raíces e tradicións".
No apartado gastronómico, o Concello apostou por levar a oferta culinaria directamente aos restaurantes e tabernas locais, permitindo aos visitantes gozar da auténtica cociña mariñeira no seu propio contexto. Ademais, as foodtrucks da Consellería do Mar ofreceron máis de 6.000 petiscos durante os populares vermús mariñeiros con música en directo.
Desde o Concello destacan que a Festa do Mar non só dinamiza o tecido social e cultural, senón que tamén representa "un motor para o turismo e a economía local".
Non en balde, a cita atraeu a persoas de todas partes de España, principalmente de Andalucía, Madrid, Galicia, Castela e León e Euskadi, e a visitantes de até 21 países diferentes, entre eles Portugal, Reino Unido, Arxentina, Estados Unidos e Francia.
A decisión de trasladar a Oficina de Turismo á Praza da Chousa tamén foi un acerto pois atendeu a máis de 2.500 persoas, sobre todo durante os días grandes do evento.
No ámbito loxístico, o Concello destacou o "bo funcionamento" do plan de seguridade, grazas á coordinación entre a Garda Civil, Protección Civil e persoal especializado.
"O tráfico foi fluído en todo momento", destacan e os visitantes puideron utilizar os máis de 6.000 metros cadrados de aparcadoiros habilitados, tanto no centro de Combarro como no Porto da Canteira, en colaboración con Portos de Galicia.
Cun balance máis que positivo, o alcalde Moldes conclúe que a Festa do Mar "afiánzase como un evento esencial do calendario festivo galego, que combina patrimonio, tradición, música e gastronomía para seguir impulsando o orgullo e identidade mariñeira do noso municipio".