O Museo de Pontevedra conmemora o Día Internacional do Libro este xoves, 23 de abril, cunha programación que vincula a música e a literatura no Edificio Castelao.
A xornada inclúe un recital lírico e a entrega gratuíta de libros ao público que se achegue ás instalacións ao longo de todo o día.
O concerto, que comezará ás 19:00 horas, estará protagonizado pola soprano Bonnie Cooper e a pianista Carmen Carreiras Pita.
O programa estrutúrase en tres partes que percorren a influencia do Século de Ouro na música española, con pezas de Eduard Toldrá e Fernando Obradors baseadas en textos de Lope de Vega ou Garcilaso de la Vega.
O bloque final dedicarase á poesía galega de Rosalía de Castro, Salvador Golpe e Antonio Noriega Varela, baixo as composicións de Marcial del Adalid, Xosé Baldomir e Juan Montes.
Bonnie Cooper, formada na Universidade de Ottawa e residente en Pontevedra, conta con experiencia en producións de ópera en Londres, Cambridge e Weimar.
Carmen Carreiras Pita, natural de Vilalba, posúe titulacións superiores de Piano e Música de Cámara polo Conservatorio Superior de Música de Santiago de Compostela e realizou estudos de posgrao en Cataluña.
LIBROS DE AGASALLO
De xeito paralelo á actividade musical, o Museo porá a disposición dos visitantes publicacións diversas durante todo o xoves 23.
As persoas que acudan ao Edificio Castelao poderán levar exemplares de catálogos de exposicións e libros especializados en arte e arqueoloxía.
Estas obras foron editadas ou coeditadas polo propio Museo xunto a outras institucións.
Engade Pontevedra Viva como fonte preferida de Google de balde
Mantente informado coas últimas noticias de actualidade.