O Centro Social A Pedreira organiza, xunto ao Concello de Pontevedra, os días 16 e 17 de maio a Festa da Lingua 2025.
O edil de Normalización Lingüística, Demetrio Gómez, presentou a programación desta festa acompañado das integrantes da Asociación A Pedreira: Pomba Longueira e Nuria Díaz.
Unhas xornadas de celebracións, abertas á cidadanía e para todos os públicos, que buscan poñer en valor a lingua galega a través da música, o teatro ou os xogos populares, entre outras actividades.
A Festa da Lingua 2025 procura ser un espazo de convivencia arredor da cultura galega, onde a tradición e a creatividade actual se dan a man.
O evento tamén incluirá a lectura dun manifesto simbólico e participativo, co obxectivo de animar ao uso da lingua galega en todos os ámbitos da vida diaria.
As actividades desenvolveranse o venres 16 en diversos espazos da cidade e o sábado 17 na contorna do número 36 da rúa Serra.
En caso de mal tempo, este segundo día trasladarase a celebración ao interior do mercado de abastos.
Dende a organización convidan a toda a cidadanía a achegarse, participar e desfrutar dunha programación pensada con agarimo e entusiasmo para celebrar a riqueza lingüística e cultural de Galicia.
VENRES 16 DE MAIO:
- 20:00 – Ruada con saída da Praza da Peregrina
- Ofrenda floral no monumento a Castelao (Rúa Alta), organizada por Amigos da Cultura
- 21:00 – Concertos na Praza da Pedreira: Regueifa Tour, Cuarta Xusta e The Teta’s Van
SÁBADO 17 DE MAIO:
- Durante toda a mañá: Book-crossing por diferentes puntos da cidade
- 11:00 – Espectáculo infantil: "Con lingua própria" de Peter Punk
- 12:00 – Xogos tradicionais con Miudiño
- 13:00 – Pasarrúas con Foula
- 14:00 – Sesión vermú con Foula e as Pandereteiras de Quireza
- 14:30 – Xantar popular (precisa inscrición ao través do código QR do cartel)
- 17:00 – Foliada final co alumnado do Centro Social A Pedreira
