A Festa dos Libros de Pontevedra inicia este venres 3 de xullo na praza da Ferrería a súa novena edición.
O evento, organizado polo Concello de Pontevedra en colaboración con trece librarías da cidade, desenvolverase durante toda a fin de semana cun programa que inclúe, entre outras opcións, presentacións literarias, actividades infantís, música e sesións de sinaturas.
As actividades no escenario darán comezo ás 11:30 horas co Colectivo Xurelo, formado por Enrique Mauricio, Tania Solla e Marcelo Dobode.
O grupo presentará Begoña Caamaño. Pequena biografía, unha proposta que conxuga narración oral, ilustración en directo e música para dar a coñecer á autora homenaxeada nas Letras Galegas 2026.
Posteriormente, ás 12:30 horas, o cantante Paco Nogueiras ofrecerá a actividade de contos e música Un verán de contos, traballo que foi editado por Kalandraka.
A figura de Begoña Caamaño volverá centrar a atención ás 18:15 horas nunha mesa redonda conducida por Víctor Freixanes.
Nela analizarase o legado xornalístico e literario da autora coas intervencións de Paula Carballeira, Beatriz Maceda, María Xesús Nogueira e María Xosé Porteiro. Na sesión presentarán as súas respectivas obras biográficas e de análise publicadas por Galaxia e Xerais.
Ás 19:15 horas, o espazo 'Traxectoria Destacada' renderá homenaxe ao autor coruñés Manuel Rivas polo seu labor nas letras galegas contemporáneas.
O Premio Nacional das Letras Españolas 2024 dialogará co xornalista Ramón Rozas sobre a súa carreira e sobre a súa última novela, Tras do Ceo.
A continuación, ás 20:15 horas, a escritora e actriz Elvira Mínguez presentará La educación del monstruo, obra galardoada co Premio Primavera de Novela.
A autora conversará coa xornalista Carolina Neira sobre este relato centrado na transmisión do medo e a violencia a través da memoria familiar.
A xornada nocturna pecharase ás 21:15 horas cun debate sobre a historia, a memoria e a identidade no ámbito atlántico, moderado por María Hermida.
O encontro contará co arqueólogo Alfredo González-Ruibal, quen afondará no seu libro País en ruinas; Xurxo Ayán e Olga Novo, coa crónica sobre a resistencia antifranquista Repil. 20 de abril de 1949; e Manuel Gago, co ensaio Ata que os mares sequen, que examina os vínculos culturais entre Galicia e Escocia.
ACTIVIDADES PARALELAS
Fóra do recinto principal, ás 19:00 horas realizarase a ruta literaria O pulso da estrofa, encadrado na iniciativa municipal Pontevedra (d)escrita.
Este paseo guiado de 90 minutos de duración explorará a relación histórica entre a música e a literatura na cidade, e require inscrición previa por correo electrónico para os maiores de 16 anos a través de [email protected].
En paralelo, as casetas das librarías acollerán quendas de sinaturas con autores como Lola Fernández Pazos, Samuel Ferro, David Lorenzo ou Paco Nogueiras pola mañá, e Laura Suárez, Jorge Campos, Raquel Piñeiro ou os propios relatores das mesas redondas pola tarde.
PASAPORTE
A principal novidade desta edición é o 'Pasaporte da Festa dos Libros'. Esta ferramenta busca promover as vendas nos establecementos locais, de xeito que as persoas que sumen selos por compras en cada unha das casetas poderán optar a acadar un agasallo no posto de información do recinto.
As librarías participantes que disporán de caseta nesta edición son Aviones de Papel, Clip, D-Lectum, El Naranjo, El Pueblo, Espazo Lector Nobel, La Nube de Papel, Libraría Paz, Librería Escolma, Librería Metáfora, Librería Seijas, Librería Cronopios e Mononoke Manga.
Os horarios de apertura ao público serán de 11:00 a 14:00 horas e de 18:00 a 22:30 horas, agás o domingo 5 de xullo, cando a feira pechará ás 22:00 horas.