A terceira cita de Os Xoves de Códax 2025 viviu unha noite de profunda emoción e beleza este xoves 7 de agosto, da man de dúas das voces máis conmovedoras do panorama musical actual: Guadi Galego e Valeria Castro.
A terraza de Bodegas Martín Códax converteuse nun escenario de intimidade, verdade e compromiso social, cun concerto que destinou toda a súa recadación á entidade ASPANAES, organización que traballa desde hai máis de 45 anos en Galicia para mellorar a vida das persoas con trastorno do espectro do autismo (TEA).
Os Xoves de Códax é moito máis ca un ciclo musical: é unha celebración do encontro entre cultura, territorio e solidariedade.
Ao longo das súas doce edicións, esta iniciativa de Bodegas Martín Códax recadou máis de 270.000 euros para entidades sociais galegas, convertendo a música nunha ferramenta de transformación real.
A noite comezou coa actuación de Valeria Castro, artista canaria que conquistou ao público coa súa voz delicada, sensible e profundamente expresiva.
Cun repertorio íntimo, baseado en cancións do seu último traballo. A artista abordou temas como a autoestima, a vulnerabilidade e o amor propio dende unha estética que ela mesma define como popclore, combinando tradición e modernidade.
A súa presenza no escenario transmitiu verdade e beleza nunha das actuacións máis conmovedoras do ciclo.
Ao escenario tamén subiu Guadi Galego, unha das grandes voces da música galega contemporánea. A súa actuación foi unha homenaxe á identidade, á lingua e á loita colectiva.
Cun directo vibrante, que combinou poesía, electrónica, folk e discurso feminista, Guadi ofreceu unha experiencia musical e emocional única. As súas letras conectaron coa realidade do público galego, cunha posta en escena potente e coidada que puxo en valor a diversidade cultural e o pensamento crítico.
Xuntas, Guadi e Valeria ofreceron unha noite memorable de sensibilidade, arte e compromiso.
A recadación desta terceira sesión foi destinada a ASPANAES, unha entidade sen ánimo de lucro que traballa para acompañar, apoiar e defender os dereitos das persoas con TEA e das súas familias.
Con presenza en toda Galicia, ASPANAES desenvolve programas de atención educativa, terapéutica, formativa e socio-laboral para persoas con autismo de todas as idades. A súa misión é promover unha sociedade máis inclusiva, ser un axente de cambio que impulse a inclusión e participación social das persoas con autismo, poñendo en valor a riqueza da diversidade e traballando por unha cidadanía máis xusta, solidaria e comprometida co benestar común.
Ser beneficiaria deste ciclo de concertos solidarios supón unha importante achega para continuar desenvolvendo estes servizos e para dar visibilidade a unha realidade que, moitas veces, segue sendo descoñecida.
