Con motivo do Día das Letras Galegas que se celebra este venres 17 e que está dedicado á escritora Luisa Villalta, o Concello de Vilaboa establece unha programación local para potenciar o uso da lingua galega na vila.
A través da Rede de Bibliotecas de Galicia e dentro do programa local Reactiva Vilaboa están a desenvolverse actividades gratuítas na Casa da Cultura de Riomaior destinadas a público infantil, que comezou cunha sesión de contacontos.
Este mércores está prevista unha actuación de títeres, destinada a escolares de máis de catro anos. A función recrea a historia de Alicia no País das Marabillas, de Lewis Carroll, con todos os personaxes característicos da gran obra narrativa como o coello branco, a lebre de marzo, o sombreireiro tolo ou a Raíña de Corazóns. Comezará ás 18.00 horas con entrada libre.
Durante o xoves 16, ás 18.30 horas, a Casa da Cultura de Riomaior acollerá a Bibliocanta, unha proposta na que o público infantil terá a oportunidade de cantar pezas tradicionais galegas e aprender ditos, recitados e retrousos.
O venres 17 de maio haberá unha sesión con 'Leo e a música' no mesmo espazo, a partir das 12.00 horas. Este espectáculo amosa a vida de Leo, o león máis singular da selva, que solicitará a colaboración da cativada para descubrir elementos sonoros.
Xa o martes 21 de maio continuará a programación cunha nova sesión do Salinas Club de Lectura, ás 20.00 horas, na BiblioCRA de Vilaboa. Vai analizarse a obra 'O mar que nos leva', de Moncha Fuentes.