Pontevedra sumará unha nova proposta cultural coa chegada do Invernia Fest, un festival que nace para demostrar que o inverno tamén pode ser tempada alta para a música.
A iniciativa está impulsada por unha dupla tan inesperada como prometedora: o pentacampeón do mundo de tríatlon Javier Gómez Noya e o empresario hostaleiro Fernando Fernández Pidal, propietario de Los 3 Monos.
O Invernia Fest celebrarase no recinto feiral da cidade os días 6 e 7 de febreiro.
Gómez Noya, aínda que segue ligado ao tríatlon como director do equipo nacional da Federación Española, hai tempo que goza da música como outra gran paixón.
O seu grupo, Liorta, xa se subiu aos escenarios n clausura do Multisport celebrado na cidade, e agora o deportista parece disposto a que o ritmo siga soando máis aló das competicións.
A diferenza doutros eventos que concentran a súa actividade no verán, esta proposta busca abrir unha xanela cultural en metade dos meses máis apagados, ofrecendo á cidade e a toda a comarca un motivo para saír de casa… e para quedar dentro do recinto feiral gozando de boa música.
Un festival para satisfacer a todos eses melómanos que deben descartar decenas de festivais no verán por non poder cadrar a súa axenda.
Cun marcado estilo pop-rock espera reunir a varios miles de persoas.
Invernia Fest estrearase incluíndo unha zona de food trucks cunha oferta culinaria do máis variado.
En poucos días anunciaranse os grupos e poranse á venda as entradas.