O grupo de investigación dx5 (Dixital & Graphic Art Research) da Facultade de Belas Artes da Universidade de Vigo organiza as xornadas 'Autoedición etc.', un encontro dedicado á autoedición que reunirá a profesionais do cómic e a ilustración con ampla traxectoria en fanzines e proxectos autoeditados.
O evento celebrarase os días 13 e 14 de abril na facultade e na sede da Vicerreitoría do campus de Pontevedra.
Na programación están incluídos unha serie de coloquios cos autores e autoras, así como dous talleres a cargo dos debuxantes Yeyei Gómez e Martín López Lam.
Coordinado polos docentes Miguel Cuba e José Andrés Santiago, estas xornadas buscan crear un "diálogo con artistas e profesionais" do cómic e a ilustración, no marco dos Encontros de Interacción Gráfica que o grupo dx5 leva varios anos realizando.
O obxectivo, explica Santiago, é explorar diferentes posibilidades no ámbito do cómic, o fanzine e en calquera manifestación artítica ligada á liberdade creativa.
As xornadas contan con dous talleres con inscrición previa e seis coloquios, que terán lugar no Laboratorio de Técnicas Gráficas de Belas Artes, no espazo 16 da facultade e na Casa dás Campás.
O primeiro taller celebrarase o luns 13 de abril no Laboratorio, a cargo de Eeyei Gómez, quen profundará na viñeta como "ferramenta para contar a realidade" e na súa capacidade para abordar a actualidade política e social desde un posicionamento crítico e irónico. A inscrición debe realizarse a través do correo [email protected].
O martes terá lugar outro taller, tamén con inscrición previa, centrado na creación dunha historia colectiva que se fixe nos "detalles cotiáns que pasan desapercibidos ou se esquecen". Correrá a cargo de Martín López Lam, debuxante, artista gráfico, creador do selo independente Edicións Valiçentes e un dos impulsores do festival de autoedición Posto de Valencia.
Na tarde do luns celebraranse na Casa dás Campás os coloquios da xornada, con Martín López Lam ofrecendo ás 17:00 horas o relatorio 'Habitar a estrañeza', seguida da intervención de Yeyei Gómez sobre a autoedición como proceso creativo, e da reflexión de Miguel Cuba sobre a autoedición en Galicia.
O martes continúan os encontros no espazo 16 de Belas Artes, con Bernal Prieto, ilustrador e deseñador gráfico responsable do festival de cómic autoeditado Autobán da Coruña; Uxía Larrosa, autora de cómic recoñecida en diversos certames, e co artista, ilustrador e docente Berto Fojo, egresado da facultade pontevedresa.
Prieto centrarase nos procesos colectivos de autoedición, Larrosa reflexionará sobre os usos pedagóxicos do fanzine, e Fojo completará o encontro falando dos proxectos colectivos.