A Aula Castelao de Filosofía presentou este mércores o programa completo da XLII Semana Galega de Filosofía que acollerá o Teatro Principal de Pontevedra entre o 6 e o 10 de abril e que este ano leva por lema "Filosofía e alimento".
O encontro convida a mirar máis alá do prato para explorar as dimensións éticas, sociais, políticas e ecolóxicas da alimentación durante unha semana estruturada en tres bloques. Polas mañás, baixo o título “Pensar o alimento”, desenvolveranse as conferencias de maior profundidade filosófica. Polas tardes, o foco trasladarase á relación entre alimentación e Galicia. E polas noites, o programa abrirase a propostas de carácter máis divulgativo.
A xornada inaugural do luns 6 contará co profesor Matías Bruera, que falará sobre 'O discreto encanto do devorante'. A historiadora Alba Díaz Geada abordará a relación entre comunidade e desigualdade no rural galego na charla 'Por ti, pan. Comunidade e desigualdade na Galiza rural (1936-1986)'. Pola noite, a xornalista Teresa Aranguren reflexionará sobre o uso da fame como arma de guerra, tomando como exemplo o caso de Gaza.
O martes 7 intervirá a filósofa e escritora Valeria Campos, que presentará a conferencia 'Ontoloxías do comer'. O historiador Xavier Castro ofrecerá novas perspectivas sobre sociedade, alimentación e historia das mulleres en Galicia, mentres que a psicóloga clínica Mónica Novas, creadora da gastrosexoloxía, explorará as relacións entre desexo, pensamento e alimentación.
A terceira xornada, o mércores 8, abrirase coa catedrática de ética e filosofía política María José Guerra Palmero, quen abordará a xustiza alimentaria desde unha aproximación ecofeminista. O profesor e crítico literario Armando Requeixo analizará a literatura gastronómica de Álvaro Cunqueiro, e o neurofisiólogo Javier Cudeiro Mazaira explicará como o cerebro humano chegou a converter o acto de comer nunha experiencia complexa.
O xoves 9 a profesora Marta Tafalla, da Universitat Autònoma de Barcelona, defenderá unha proposta filosófica para deixar de comer animais. Pola súa banda, Enrique Banet, presidente da Fundación Galicia Verde, falará de soberanía alimentaria e nutrición ayurveda, e a antropóloga Mabel Gracia Arnáiz pechará a xornada coa conferencia 'Comemos o que somos', sobre o que a antropoloxía pode achegar ao estudo da alimentación.
A semana concluirá o venres 10 coa filósofa Gabriela Berti, que revisará as micropolíticas do prato desde Epicuro ata a actualidade. A historiadora económica Luísa Muñoz Abeledo analizará o papel das mulleres nos niveis de vida do litoral galego entre os séculos XIX e XX. A clausura correrá a cargo do filósofo Javier Sádaba, que ofrecerá a lección final titulada 'Cultura e filosofía'.
