O Pazo da Cultura de Pontevedra converterase este sábado 7 de xuño na plataforma de promoción da lingua galega coa celebración da sexta edición dos Premios Mil Primaveras.
O evento, organizado pola Coordinadora de Traballadores/as de Normalización da Lingua (CTNL), recoñecerá catro proxectos destacados polo seu labor na posta en valor e fomento do galego.
A gala, que dará comezo ás 11:30 horas no Salón de Actos do Pazo da Cultura con entrada libre ata completar a capacidade do recinto, será conducida pola actriz e narradora oral Atenea García, integrante da Asociación de Narración Oral Galega (NOGA).
Na presentación do evento, celebrada este mércores 4, Demetrio Gómez, edil de Normalización Lingüística de Pontevedra, destacou o compromiso da cidade co idioma propio: "Vivimos nunha cidade que unha vez tras outra demostra que está moi orgullosa do seu idioma. Para nós é un orgullo colaborar coa CTNL e poñer en valor proxectos de éxito como os que se premian este sábado".
Anxos Sobriño, secretaria dos premios, subliñou que a iniciativa, nacida en 2019, "ten a finalidade de valorar, recoñecer e difundir accións, campañas, programas e proxectos que teñen como obxectivo principal o fomento da lingua e a procura do incremento do seu uso e prestixio".
Os proxectos galardoados nesta edición son:
-
Brazolinda: unha iniciativa empresarial de creación de xogos de mesa en galego, premiada pola calidade dos seus produtos, por estar dirixida a un amplo abano de idades e por asociar o noso idioma ao xogo como ferramenta para o lecer, a aprendizaxe e a socialización.
-
Galego para peques: un proxecto audiovisual dirixido á primeira infancia, recoñecido por poñer o foco no período de adquisición da lingua e na necesidade de materiais para xogar e aprender en galego.
-
Modo galego, actívao!: un programa integral de dinamización lingüística desenvolvido polo Concello de Ames e a Real Academia Galega, destacado pola súa planificación coidada que promove a reflexión sociolingüística interxeracional.
-
Vitamina G: unha iniciativa educativa do CEIP Sagrada Familia da Coruña, premiada por usar o galego como factor de cohesión e integración social, por conseguir unha grande implicación do alumnado e pola creatividade na súa mensaxe.
Ademais dun diploma, os premiados recibirán un galardón consistente nunha peza artística elaborada por Coas Mans Artesanía, obradoiro de cerámica e vidro de Silleda.
Os Premios Mil Primaveras, que carecen de dotación económica, buscan principalmente difundir boas prácticas que poidan servir como modelo para outras iniciativas.
Todos os proxectos premiados nas seis edicións celebradas ata o momento, un total de 32, poden consultarse no web milprimaveras.gal, unha ferramenta que, segundo Sobriño, "é moi útil para servir de inspiración a nivel técnico por parte dos equipos de Normalización Lingüística, docentes, asociacións e outras entidades".
Os Premios Mil Primaveras están promovidos e organizados pola CTNL co apoio económico da Deputación de Pontevedra e a colaboración do Concello de Pontevedra para a celebración desta gala.