Durante oito martes de febreiro e marzo, o Museo de Pontevedra vai cuestionar como durante séculos o papel da muller na arte foi o de obxecto artístico e non o de suxeito e analizar por que musa é un termo feminino e xenio é masculino.
Será a través do curso de divulgación cultural ‘Máis que Musas’, impartido pola profesora Marta Riera, doutorada en Belas Artes.
O curso está estruturado en oito sesións, cada unha dedicada a unha muller relevante na historia da arte. Todas serán de 19.00 a 20.30 horas no Edificio Castelao.
Percorrerán diversos contextos culturais, xeográficos e temporais de mulleres vinculadas a distintas disciplinas artísticas, e analizará as súas experiencias vitais e o seu legado no presente.
A primeira será este martes 3 de febreiro e estará dedicada a Élisabeth Vigée Lebrun, retratista de María Antonieta
A continuación, haberá sesións centradas en Cecilia Beaux, Gabriele Münter, Eileen Gray, Barbara Hepworth, Peggy Guggenheim, Lee Miller e Maruja Mallo.
Este curso pon en cuestión a historia da arte dominante para dar a coñecer outras realidades menos transitadas no ámbito académico.
A actividade durará ata o 24 de marzo e o acceso é libre, pero quen queira obter un certificado de asistencia deberá inscribirse previamente en [email protected] e acudir como mínimo ao 70 % das sesións.