A Facultade de Belas Artes do campus de Pontevedra recolle diferentes sensibilidades artísticas grazas á exposición "Dentro de una maleta", inaugurada o luns 19 na sala O Abrigo.
A mostra, comisariada polo egresado pontevedrés Manuel Balsas, reúne as creacións de nove estudantes da Universidade de Castella-A Mancha (UCLM), todas elas transportadas literalmente nunha maleta desde Cuenca ata Galicia.
A idea xurdiu durante a estancia de Balsas no Mestrado en Investigación en Prácticas Artísticas e Visuais da UCLM, cando decidiu traer consigo unha selección de obras dos seus compañeiros para compartir "outras formas de pensar, de sentir e de aproximarse aos problemas da práctica artística" co público pontevedrés.
O propio formato da exposición convértese nunha metáfora sobre a precariedade do mundo artístico, xa que todas as pezas debían cumprir un requisito fundamental: poder ser transportadas nunha maleta. "É unha mostra relacionada cos que volvemos e queremos traer algo de fóra", explica Balsas, segundo recolle o DUVI.
A diversidade é o eixo central desta proposta, que inclúe dende un instrumento tecido con auriculares de Laura Budia ata os cadros de Toni Serrano e os debuxos de Marta Moya.
Tamén se poden apreciar as cianotipias de Ivette Veles, as pezas escultóricas de María González Redondo e Ángel Raquidiam, videocreacións de Jhonson Ogando e Colectivo Craneal, e unha peza bordada de Leandra Adela Muñoz.
A exposición, xestionada polo colectivo artístico Lupercais, poderá visitarse na sala O Abrigo ata o 30 de maio.
MURAL PARA O IES SÁNCHEZ-CANTÓN
Paralelamente, a Facultade de Belas Artes, a través do seu Vicedecanato de Cultura, colabora co IES Sánchez-Cantón nun concurso para a realización dun mural no patio exterior do instituto pontevedrés.
O proxecto busca transformar unha superficie de aproximadamente 60 metros cadrados, cunha convocatoria aberta tanto a estudantes e egresados de Belas Artes como a artistas en xeral.
As propostas, que poden ser abstractas ou figurativas e deben inspirarse na contorna arquitectónica, o río Gafos ou a historia do barrio, poden presentarse ata o 15 de xuño a través do correo electrónico [email protected].
A persoa gañadora, seleccionada por un xurado composto por docentes do Departamento de Pintura da Universidade de Vigo e do instituto, recibirá 1.200 euros de honorarios e deberá executar o mural en xullo, con custos de produción cubertos pola organización ata un máximo de 300 euros.
Exposición Dentro de una maleta
Obra da mostra Dentro de una maleta
Público na mostra de Manuel Balsas
Unha persoa na exposición Dentro de una maleta
Visitante na mostra Dentro de una maleta
Obra de 'Dentro de una maleta'
Exposición Dentro de una maleta
Obra da mostra Dentro de una maleta
Público na mostra de Manuel Balsas
Unha persoa na exposición Dentro de una maleta
Visitante na mostra Dentro de una maleta
Obra de 'Dentro de una maleta'