Marín celebra o 125 aniversario de Manuel Torres cunha exposición inédita no seu museo

O Museo Manuel Torres acolle a exposición "Florecer no mar de primaveiras amargas… Manuel Torres na explosión De catro a catro", unha mostra única coa que o Concello de Marín dá comezo á programación conmemorativa do 125 aniversario do nacemento do pintor marinense, unha das figuras máis destacadas da vangarda galega do século XX.

A inauguración, celebrada na tarde deste venres, reuniu a representantes institucionais, persoas vinculadas ao ámbito cultural e veciñanza, que puideron asistir ás intervencións da alcaldesa de Marín, María Ramallo; do comisario da exposición, Ramón Rozas; e do artista Antón Sobral, colaborador do proxecto. Tras o acto oficial, os asistentes participaron nunha visita guiada polas salas da man do propio Rozas.

Promovida polo Concello de Marín e coa colaboración da Deputación, a través do Museo de Pontevedra, así como da Xunta de Galicia, a exposición propón un diálogo artístico entre Manuel Torres e o poeta Manuel Antonio.

Segundo explicou Ramón Rozas, a mostra parte das numerosas conexións existentes entre ambos creadores, unidos por unha mesma mirada vangardista e por unha profunda relación co mar.

"Ambos coinciden na súa mirada de vangarda cara á liña do horizonte, propoñendo desde o mar un discurso cheo de vitalidade que repara na relación do ser humano con ese contexto desde o existencial, o cultural ou o estético", sinalou o comisario durante a presentación.

A exposición reúne obras de especial relevancia, entre elas algunhas que nunca antes foran exhibidas no museo marinense. Destaca a presenza de Traxe de buzo, unha das pinturas máis emblemáticas de Manuel Torres, cedida para a ocasión polo Museo de Pontevedra xunto con outras pezas procedentes dos seus fondos.

O percorrido expositivo estrutúrase en cinco ámbitos temáticos (A travesía, Dentro/Fóra, Soidade, A xente e A Banda do Río) que permiten afondar na evolución artística do pintor marinense e na súa relación simbólica co universo poético de Manuel Antonio.

Nas salas, fragmentos dos poemas do autor rianxeiro, reproducidos en vinilo a partir dun caderno manuscrito, acompañan as obras de Torres creando un diálogo entre pintura e literatura.

Un dos obxectivos centrais da mostra é reforzar o recoñecemento de Manuel Torres como un dos grandes representantes da vangarda galega dos anos trinta. A exposición reivindica a súa figura dentro do contexto artístico da época, poñendo en valor unha traxectoria que, segundo os seus promotores, non sempre recibiu a consideración que merece.

Durante a inauguración, a alcaldesa María Ramallo destacou a importancia de dedicar esta efeméride ao pintor que dá nome ao museo. Ramallo tamén agradeceu ao Museo de Pontevedra a cesión das obras que forman parte da exposición. 

A mostra permanecerá aberta ao público durante todo o verán, ata mediados de setembro. Ademais, coincidindo co inicio do próximo curso escolar, ofreceranse visitas guiadas para centros educativos interesados en achegar ao alumnado a figura e a obra dun dos artistas máis relevantes da historia cultural de Marín e de Galicia.