+Música organiza 93 concertos na súa terceira edición

A Deputación de Pontevedra aposta de novo polo programa +Música, poñendo en valor os grandes artistas e grupos de Galicia e impulsando a lingua galega na industria musical. Os concertos terán lugar durante oito meses, entre maio e decembro, igual que en 2025.

Esta mañá do mércores 25 de marzo, a entrada do Pazo Provincial foi o escenario da presentación da terceira edición da iniciativa, na que interviñeron Jorge Cubela, deputado de Cultura de Pontevedra; Luís López, presidente da Deputación; Nava Castro, alcaldesa de Ponteareas, e numerosos alcaldes, concelleiros e representantes de produtoras, realización e programación de eventos ao redor da provincia.

O acto de inauguración comezou e finalizou cunha pequena actuación do cantante galego 9louro cos seus temas "Eu e ti" e "Os meus males", un dos moitos artistas que protagonizan o cartel de +Música, chamando a atención dos presentes.

Jorge Cubela resaltou a importancia deste tipo de propostas para os municipios, agradecendo ao presidente da Deputación a súa "aposta persoal en incrementar o crédito necesario para que os concellos poidan programar máis".

A esencia de +Música consiste en proporcionar "unha programación de calidade", chegando a pequenos vilas e aldeas ao redor da provincia, e non aos concellos de maior poboación exclusivamente.

Doutra banda, Nava Castro fixo mención ao auxe de grupos musicais que está a vivir Ponteareas, grazas á creación de concursos como 'Talentos Xove' ou 'Xuventude Crea', da man da Deputación, que fomentan a aparición de artistas galegos.

Ademais, a Deputación ofrece un amplo programa de selección aos concellos, con 286 artistas musicais, para que estes poidan acceder aos músicos con orzamentos máis elevados. A alcaldesa de Ponteareas tamén comentou a facilidade que ten o proceso telemático a través do que se solicitan estes concertos.

Por último, Luís López mostrou a súa satisfacción ante a organización dunha nova edición do proxecto iniciado en 2024 aclarando que "non se entenden as nosas festas e estilo de vida sen música".

O evento está dirixido cara aos concellos con menos de 50.000 habitantes, participando 58 dos 61 existentes en Pontevedra, que utilizarán os 700.000 euros destinados ao programa "para que chegue a música a todos os recunchos da provincia".

Desta forma, o presidente da Deputación asegurou que "queremos afrontar o reto demográfico, unha área que creamos cando chegamos ao goberno, tamén desde a cultura". Para iso, ademais desta proposta, leváronse a cabo outras como +Escénica, fomentando a danza e teatro, ou a celebración dos Mestre Mateo de 2023 en Lalín, trasladándose "ao rural".

As novidades deste ano consisten nun aumento dos grupos ofertados aos diferentes municipios, coa incorporación de 62 novos nomes, un incremento do 28%. Cada concello poderá solicitar unha actuación máis que o ano pasado, chegando a un máximo de tres.

Organizaranse até un total de 93 concertos, 15 máis con respecto a 2025, con 56 grupos profesionais galegos e 24 artistas debutantes, con moita variedade de estilos para diferentes públicos. Con isto, Luís López convida a toda a comunidade a asistir declarando que "as Rías Baixas soan a música en galego".