O arquitecto Mauro Lomba inaugurou este venres 17 o novo local coa intención de convertilo en espazo multidisciplinar no centro histórico de Pontevedra.
Nemonon está situado agora na Praza da Ferrería número 1 e abre unha nova etapa como punto de encontro entre a arquitectura e outras expresións artísticas e culturais.
A apertura do local celebrouse cunha exposición titulada 'Nubes e claros - Voar co pensamento', que contou coa participación do escritor e pedagogo Xaime Toxo, e do propio Mauro Lomba.
As fotografías das obras expostas amosan algúns dos nosos proxectos, sempre coa intención de potenciar a arquitectura centrada nas persoas en conexión coa natureza.
O acto estivo amenizado musicalmente por Mario Diz, director da Orquestra e Coro da Universidade de Santiago de Compostela, quen interpretou pezas de Bach e Manuel Quiroga, ademais dunha composición propia, "Psyqué, Tan-go!", que foi estreada durante o evento.
Este novo centro cultural e estudo de arquitectura manterá as súas portas abertas en horario de 12:00 a 14:00 horas e de 19:00 a 21:00 horas os días laborables.
Segundo explicou Lomba, Nemonon aspira a ser "unha fragua da cultura creativa" que acollerá propostas de diferentes disciplinas artísticas e fomentará o intercambio de coñecementos entre profesionais do sector cultural.
O Espazo Nemonon mantivo durante anos a súa sede no edificio de Villa Pilar na rúa Riestra. Agora afronta unha nova etapa noutro punto céntrico da cidade coa intención de se converter en corazón cultural de Pontevedra.