Volve Novos Cinemas. O festival internacional de cine de Pontevedra vén de abrir o prazo de recepción de obras para a súa undécima edición, que se celebrará entre os días 8 e 13 de decembro.
Cineastas emerxentes de todo o mundo poderán inscribir os seus filmes ata o 1 de setembro nas dúas seccións competitivas do festival: a sección oficial e Latexos.
A sección oficial, segundo apunta a organización, volverá a estar orientada a propostas cinematográficas arriscadas e heterodoxas.
Latexos, pola súa banda, estará destinada a visibilizar obras de carácter íntimo e de produción máis contida.
Poderán participar longametraxes que sexan primeira ou segunda obra dos seus realizadores, sempre que non foran estreadas comercialmente en España nin exhibidas en televisión no momento da inscrición.
A terceira convocatoria do festival, Ceres, dirixida a centros de ensino e formación cinematográfica e audiovisual de España e Portugal, anunciarase proximamente.
Como en anos anteriores, Novos Cinemas concederá seis premios, entre eles o de mellor longametraxe da sección oficial, dotado con 3.000 euros; e o premios Latexos, que inclúe a exhibición comercial da película premiada e 500 euros para a dirección.
A eles sumaranse o premio xurado novo á mellor dirección da sección oficial, outorgado por alumnado da Universidade de Vigo; o premio da crítica, concedido por profesionais da crítica cinematográfica; e o premio do público á película mellor valorada pola audiencia.
O premio Ceres, por último, concederá 1.000 euros á mellor curtametraxe da súa sección.