A estrea no Museo de Pontevedra da obra mestra de Alfonso Daniel Rodríguez Castelao, A derradeira leición do mestre, provocou reaccións derivadas da ausencia da familia de Bóveda e da protesta de Mocidade Galega pola Memoria.
O lenzo, que se pode ver desde este xoves no Edificio Castelao, viaxou desde o Centro Galicia de Bos Aires e permanecerá na cidade ata o 27 de setembro. A obra rememora o fusilamento do galeguista Alexandre Bóveda a mans do exército franquista.
O acto oficial congregou as principais autoridades, entre elas o presidente da Xunta de Galicia, Alfonso Rueda, e o conselleiro de Cultura, José López Campos, ademais do alcalde de Pontevedra, Miguel Anxo Fernández Lores.
Pero a xornada viña marcada polo rexeitamento público da filla do político asasinado en 1936, Amalia Bóveda, e pola protesta silenciosa, coa exhibición de carteis, da asociación en defensa da memoria histórica.
O presidente da Deputación de Pontevedra, Luís López, respondeu este venres ao grupo provincial do BNG, que decidiu non acudir ao acto, e á Mocidade Galega pola Memoria durante a rolda de prensa posterior á xunta de goberno.
López argumentou que a peza artística transcende as siglas políticas: "Hai quen pensa que iso ten dono, ou quere apropiarse del. E non, isto é de todos, non é só dalgúns".
O dirixente provincial indicou que "o que lles molesta é que non foron eles capaces de traer o cadro. Iso é o único que lles molesta".
Con carteis onde se indicaba que "Non hai respecto sen memoria: institucionalización do Día da Galiza Mártir xa!!" ou "Quen asasinou a Bóveda non pode herdar a Castelao", o colectivo xuvenil cualificou de contraditoria a postura do Partido Popular, que goberna a Deputación de Pontevedra e a Xunta de Galicia.
O presidente da agrupación, Pablo Abelleira Acebedo, afeou nun comunicado ao partido do goberno que utilice a imaxe do cadro "para a foto" mentres "continúa sen realizar unha condena clara do franquismo" e rexeita votar no Parlamento de Galicia a favor do recoñecemento oficial do Día de Galiza Mártir o 17 de agosto.
AMALIA BÓVEDA
A esta crítica sumouse a ausencia de Amalia Bóveda. A filla do mártir galeguista declinou o convite oficial por razóns de "dignidade e coherencia cívica e política".
Nun comunicado, manifestou a súa negativa a "acompañar a quen, cos seus votos, actos e pactos diarios, nega a realidade histórica e institucional do que ese cadro representa", en alusión directa aos acordos do PP coa formación de extrema dereita VOX, o que cualificou de "branqueamento".
Amalia Bóveda denunciou que o legado do seu pai "non é mercadoría electoral nin un decorado para o cinismo político" e criticou a estratexia de crear unha "falsa equidistancia" no debate da memoria democrática.
Luís López quixo rebaixar o ton cara á liñaxe do dirixente fusilado, expresando o seu "máximo respecto á familia Alexandre Bóveda e a Amalia en particular".
O presidente provincial asegurou comprender o fondo impacto emocional que posúe a exhibición do lenzo no terreo persoal para os seus descendentes.
"Liberdade toda a do mundo para que visite o cadro no Museo de Pontevedra de xeito público ou de xeito privado. Disposición máxima", engadiu López.
Recalcou tamén que a familia Bóveda "foi colaboradora en todo momento neste exposición e conta con todo o noso cariño e respecto".