Polo Correo do Vento, empresa que traballa na elaboración de contidos e na difusión e realización das actividades vinculadas á cultura galega, vén de realizar
'O Camiño andado das Letras', un proxecto para celebrar o 60º aniversario do Día das Letras Galegas cun percorrido polas persoas ás que se lle dedicou historicamente a data máis importante da literatura galega.
Trátase dunha iniciativa que consiste na publicación diaria na web da Deputación de Pontevedra de fichas didácticas sobre a vida e obra de todas as personalidades homenaxeadas nas Letras desde o 23 de febreiro, Día de Rosalía, ata o 17 de maio, data na que o protagonista será Francisco Fernández del Riego, escritor ao que se lle dedica este ano 2023.
Cada autor ou autora é protagonista de dúas pezas didácticas, unha destinada ao público infantil e outra ao público adulto. Nelas inclúese unha ilustración, unha pequena biografía, un apartado de ‘grandes éxitos’ e un texto significativo da súa obra, así como unha pequena cita ou comentario de Fernández del Riego sobre a personalidade en cuestión.