A sala Karma abriu este sábado a un horario inusual para os seus concertos, a sesión vermú, e triunfou coa aposta. O público abarrotou a sala e entregouse cual groupies das bandas máis consolidadas para dar a benvida ao panorama musical a Furious Monkey House.
A nova banda ten a peculiaridade de que os seus integrantes teñen 9 e 10 anos. Tres rapazas e un rapaz que se presentaron en sociedade cun proxecto de rock infantil, pero cunha forza que ben quererían moitos afeccionados adultos.
A sesión vermú abriuse ás 13.00 horas e unha vez que o ambiente estivo xa ben caldeado saltou ao escenario Neira como entrante, con cancións en solitario afastadas das propostas da súa banda MLK. Media hora despois, desatouse o furor, saltou ao escenario a banda máis nova que pasou por Karma e Mariña, Irene, Carlota e Lucas, acompañados polo seu mono furioso, metéronse a todos no peto.
Para os que non puideron gozar do debut, haberá unha segunda oportunidade de velos durante o festival Surfing The Lérez 2014.