O Salón do Libro Infantil e Xuvenil celebrarase en Pontevedra do 11 ao 27 de marzo. Previamente, a Concellería de Cultura vai adiantando algúns dos contidos e persoeiros que protagonizarán esta 23 edición.
A concelleira de Cultura, Carmen Fouces, presentaba este mércores a artista seleccionada para crear o cartel que acompañará ao evento: Bea Gregores. A propia ilustradora explicaba que se atopa moi vinculada coa cidade de Pontevedra polos seus estudos na Facultade de Belas Artes. Precisamente o lema desta edición do Salón é 'Con moita arte!', sobre o que Gregores apuntou que "este ano é dedicado á arte, co cal vincúlase moitísimo co meu traballo e co que eu dedico a miña vida e por iso estou moi ilusionada".
A artista avanzou a idea que pretende plasmar no cartel: "Gustaríame tratar as diversas ramas da arte, tanto a literatura como a escritura, a danza, o canto, absolutamente todas as artes das que podemos desfrutar no salón".
Na súa traxectoria profesional, Bea Gregores acadou o primeiro premio de 'La palabra pintada' e de 'Xuventude Crea' e ilustrou diversos libros de literatura infantil e xuvenil, como 'As lavandeiras de San Simón', 'Douche a miña palabra', 'Bicos, non balas', 'A vaca Cuca' e 'Emilia Pardo Bazán, unha mente poderosa'.
A escolla de Bea Gregores fíxose a partir da selección de portfolios de ilustradores galegos ou que residan e realicen a súa actividade profesional en Galicia, nunha convocatoria aberta á que se achegaron 39 propostas e que contou co asesoramento da Asociación de Ilustradoras e Ilustradores.
ARTISTAS HOMENAXEADOS
Nesta presentación tamén se anunciaron os nomes das dúas persoas que serán homenaxeadas no salón deste ano e que se caracterizan por ser impulsoras da literatura infantil e xuvenil galega: a escritora Marica Campo e o ilustrador Xosé Cobas. O acto celebrarase o 26 de marzo e nesa xornada haberá conferencias, contacontos e unha exposición sobre os artistas. Ademais, Xosé Cobas, presentará a súa nova obra.
Marica Campo (O Incio, 1943) será a homenaxeada "no eido da palabra", adiantaba Carmen Fouces, quen se refería ao feito de que comezase a publicar cando xa pasaba dos corenta anos e que esta circunstancia terá un debate no Salón para saber se o feito de ser muller neses anos condicionou esta decisión. Como mestra, Campo estivo moi en contacto co público mozo, para o que escribiu obras como 'Confusión e morte de María Baleira' ou 'Pedinche a luz prestada', entre outras. A concelleira de Cultura destacaba a obra 'Nosoutras', ilustrada por Menchu Lamas e que recibiu o ano pasado o premio Rosalía de Castro ao libro mellor editado.
Xosé Cobas (Negreira, 1953) recibirá unha homenaxe pola súa achega á "historia contada con imaxes", que combina coa pintura. Cunha obra moi ampla, Cobas suma 220 libros ilustrados e 35 anos adicados á ilustración infantil. Entre as súas obras, a concelleira de Cultura sinalaba os dous últimos traballos pola súa vinculación coa cidade de Pontevedra: 'O pintor cego' con texto de Xabier Docampo e editado por Kalandraka e 'O xenio da cidade do sal' que parte dun texto da escritora pontevedresa Fina Casalderrey.
Engade Pontevedra Viva como fonte preferida de Google de balde
Mantente informado coas últimas noticias de actualidade.