Laura Portas comezou 2026 coa publicación da súa segunda novela, 'El palacio del agua'. Unha novela que aúna xénero romático, aventura, intriga e tamén historia.
Si no seu debut literario situou 'El baile de las mareas' na súa localidade natal, Cambados, esta vez faio en Mondariz Balneario: "quería recuperar o esplendor que ten Mondariz e tamén facer unha homenaxe ao noso patrimonio galego", di a autora no podcast 'Cara a cara'.
O marco temporal son os anos vinte do século pasado, o momento de esplendor para o municipio pontevedrés que atraía até a provincia ás elites internacionais para beneficiarse das súas augas mineromedicinais.
Candela é a protagonista do relato, unha modaricense que comeza a traballar no Gran Hotel. Algunha morte violenta, uns misterioros achados, un pasado descoñecido e o amor de dous homes se aúnan na vida desta nova e na trama da novela.
A autora conxuga ficción e realidade: "ten moito de real porque eu estiven en Mondariz Balneario con veciños cuxos familiares tiñan fondas e que recibían a eses "agüistas". Eles contábanme esas historias que van pasando de xeración en xeración e que axudan tanto a humanizar os personaxes e a enriquecer a trama".
Así, 'El palacio del agua' retrata a oriúndos e visitantes daquel momento: "a diferenciación de clases sociais é algo que tamén tento reflectir moi ben na novela. Por unha banda temos eses hóspedes, esa riqueza intelectual, social e política que utilizaban Mondariz como punto de reunión; e todo o contrario, o servizo, esa Galicia rural que queda afastada dos muros do Gran Hotel".
Outra das dualidades que inclúe Portas son dous elementos fundamentais na historia: a auga e o lume, "interesábame moito traballar estes simbolismos na literatura porque a auga ten esa forma de canalizar emocións e o lume axúdache a rexurdilas", explica.
En palabras dos seus personaxes introduce os seus dous exercicios profesionais: "cando traballo como xornalista, é como contar a realidade cos ollos, e escribir é contar a túa verdade co corazón. Eu trataba un pouco de plasmar estas dúas facetas, o momento no que ti escribes unha noticia e o momento no que che enfrontas a ese papel en branco".
Na seguinte ligazón pódese escoitar a charla completa precedida dunha recreación sonora de 'El palacio del agua'.