A oferta cultural da cidade amplíase cun novo ciclo que traerá seis comedias protagonizadas por compañías locais. As obras representaranse no Teatro Principal e tratarán temas sociais, familiares e de superación persoal, sempre cun toque de humor.
Despois dos ciclos Ponteatro e Domingos no Principal, a programación teatral de Pontevedra engádelle unha nova proposta: Teatro de Barrio, unha iniciativa centrada na promoción das artes escénicas feitas na cidade. O ciclo contará con seis montaxes teatrais que abranguen estilos diversos, desde o costumismo ata o humor negro.
A primeira función será este mércores 24 de setembro coa obra "Ai avoa!", da man de Desfeita Teatro. Unha comedia de humor negro que retrata unha familia de clase traballadora en decadencia económica e moral por culpa da "crecente voracidade da avoa". A obra é unha crítica social que utiliza o humor para expoñer o egoísmo, a indolencia e a perda de valores.
Para o xoves 25 de setembro, está programada a representación de "Historias da Illa", unha comedia interpretada pola Escola municipal de Teatro da Illa de Arousa con fondo social que mestura reivindicación e memoria histórica. A obra, posta en escena por un elenco interxeracional con actores e actrices de entre 10 e 80 anos, relata como unhas rapazas, a partir dun traballo escolar, descobren o pasado da súa comunidade conversando cos maiores.
O venres 26 de setembro poderase ver a obra "O marabilloso mundo de Oz", da man do grupo Ilusionistas. Unha proposta de teatro familiar e musical que narra unha historia de crecemento e superación persoal. A obra destaca valores como a forza da amizade e a importancia de vencer os medos en boa compañía.
Mércores 1 de outubro: "Os veciños do lado", da compañía Fauna 113. Unha cea de cortesía entre dúas parellas veciñas convértese nun encontro disparatado cheo de dobres intencións e segredos inconfesables.
O xoves 2 de outubro porase en escena "Prescripción facultativa", a cargo de Amileños. Unha comedia familiar onde os fillos dunha matriarca manipuladora artellan un plan para rematar coa súa tiranía, o que provoca un cambio radical na nai con inesperados "efectos secundarios".
Completa o ciclo o venres 3 de outubro: "Feliz aniversario", a cargo de Teatro Xenio, a compañía máis antiga de Pontevedra con 50 anos de traxectoria. Unha comedia de enredo centrada nunha familia con plans paralelos e incompatibles durante a celebración dun aniversario onde o champaña xa está servido.