A contorna da Praza da Ferraría e o Paseo de Antonio Odriozola son desde este venres epicentro da xa tradicional homenaxe de Pontevedra ao folclore galego que se celebra cada verán co Memorial Ricardo Portela.
O Memorial celebra este 2025 a súa vixesimosexta edición, organizado polo Concello de Pontevedra e a Asociación de Gaiteiros e Gaiteiras Galegas (AGG).
As celebracións iniciáronse este venres, pero foi este sábado cando se viviron os momentos centrais do evento, coa homenaxe a Erminda Miramontes, cantareira e pandeireteira nada en Grixoa realizada pola noite na Praza da Ferraría.
A tradicional cita inclúe actuacións musicais, pasarúas e a XXIII Mostra de Artesáns de Instrumentos Tradicionais.
Esta última puido visitarse este sábado en horario de mañá e tarde no Paseo de Antonio Odriozola e continuará este domingo, de 11.30 a 14.00 e de 17.30 a 21.30 horas.
Este sábado Pontevedra rendeu homenaxe á música tradicional en todas as súas rúas e prazas, con pasarrúas e actuacións de Ansuíña, As Fabulosas da Baña, Erdeiros dos Morenos de Lavadores e Tribo en horario de mañá e tarde.
O colofón á xornada foi, xa pola noite, despois da homenaxe, o concerto de Mediarea na Praza da Ferraría.
Este domingo, haberá pola mañá actuacións de Gaiteiras do Berce, Gaiteiros do Ulla, Lobeira e Os Mecos de Ogrobe polas prazas e rúas da cidade e, pola tarde, pasarrúas dos mesmos grupos.
O Memorial rematará ás 21 horas terá lugar na Praza da Ferraría co concerto de Cantometrics.