Dez creadores formados na Facultade de Belas Artes e que na actualidade son profesionais da banda deseñada, a ilustración e a animación protagonizan a exposición '9 narrativas gráficas e unha animación desesperada'.
A Sala Universitaria Profesor Manuel Moldes inaugura esta mostra este venres 19 de maio.
O comisario da exposición e editor de cómics Kiko da Silva e o vicedecano de Cultura e Alumnado e novo responsable da sala, Ignacio Pérez-Jofre, presentaron este luns unha mostra que reúne as creacións dos exalumnos Alberto Vázquez, Brais Rodríguez, Jano, José Domingo, Julia Lago, Martín Romero, Miguel Cuba, Miguel Porto e Miriam Iglesias, así como do propio Kiko da Silva.
A comezos deste século sucedeu "algo realmente revolucionario" no referido á expansión deste xénero en Galicia, xa que os seus autores, boa parte deles "debuxantes que estabámonos formando en Belas Artes", pasaron de "facer fanzines a profesionalizarnos, reivindicar o oficio e fundar asociacións profesionais... ", como o lembrou o comisario desta mostra e tamén director da escola de banda deseñada O Garaxe Hermético.
Trátase, engadiu Pérez-Jofre, de artistas cunha "obra de gran calidade", que conta ademais "con moita implantación do tecido profesional e cultural de Galicia, de España e incluso internacional".