RADIO.- Este é o 'Chapoteo' que tes que dar este verán e vén con Trendy Soft Soda

Pontevedra
15 de xullo 2023

'Si no sales' é o primeiro e único avance de 'Chapoteo', o álbum debut de Trendy Soft Soda. Charlamos con eles en PontevedraViva Radio. Se estás na órbita de Rauw Alejandro, Bad Bunny ou Feid, presta atención porque esta fin de semana hai algo novo que escoitar; e coidado, porque se pega como a calor no verán

Sito Flores e Maek conforman Trendy Soft Soda
Sito Flores e Maek conforman Trendy Soft Soda / PontevedraViva

Maek e Sito Flores conforman Trendy Soft Soda. Levan máis dun ano traballando no que vai ser o seu primeiro álbum, 'Chapoteo'. Esta fin de semana preséntano en directo e seguidamente estará dispoñible en plataformas dixitais. Antes pasáronse polo 'Cara a cara' para coñecer mellor a estes dous mozos oriúndos de Samieira, Poio.

Cada un pola súa conta facían a súa música antes de 2018. Coincidían en influencias dos xéneros urbanos daquel momento como Pimp Flaco, Hwoarang, Dellafuente ou La Mafia del Amor. En 2021 presentaron o tema que maior repercusión lles deu ata o de agora: 'Money talk'.

Con el deron tamén outro paso e crearon un grupo de traballo artístico ao que chamaron5274 contando con Marko Otero (cámara), Joel Costas (deseñador gráfico) e Samuel Moldes ("o que pon orde de cando en vez"). A eles súmanse colaboracións puntuais como foi o caso de Víctor Pazos.

Do mesmo xeito que os xéneros urbanos de finais da década pasada, Trendy Soft Soda tamén evolucionou e o resultado é 'Chapoteo'con catorce temas. Un traballo no que soa reguetón, hiperpop, deep house e ata experimentan co bolero.

Por agora - e ata a medianoite do domingo - o único que avanzaron é 'Si no sales' un reguetón que se pega como a calor no verán e que desde esta semana pódese escoitar e tamén ver o correspondente videoclip gravado nun recoñecible emprazamento pontevedrés. 

Nada que envexar a cantidade de nomes que se coan no mainstream. A presentación de 'Chapoteo', este sábado 15 no Fifty Club de Pontevedra ás 22.30 horas.

O podcast completo pódese escoitar na ligazón que se adxunta e tamén descargalo desde a web de PontevedraViva Radio.