O vicepresidente da Deputación de Pontevedra, Rafa Domínguez, conseguiu irmandar as Bienais de Pontevedra e Venecia para fortalecer relacións institucionais e explorar oportunidades de colaboración.
O presidente da Biennale di Venezia, Roberto Cicutto, aceptou o convite trasladado por Domínguez para asistir á inauguración da Bienal de Pontevedra.
Neste primeiro día na cidade italiana, a delegación pontevedresa encabezada polo vicepresidente provincial, visitou o Pavillón de España e a Colección Pinault.
"Pechamos unha xornada chea de información e ideas para a programación non só da Bienal deste ano, senón das vindeiras", remarcou Domínguez, que estará en Venecia ata o domingo convidado pola organización da recoñecida mostra italiana.
A delegación da Deputación, na que ademais de Domínguez atópase parte do equipo comisarial da Bienal de Pontevedra integrado por Antón Castro, Ángeles Tilve e Agar Ledo, tivo a oportunidade de coñecer o pavillón de España na Biennale di Venezia, un dos eventos máis importantes da arte contemporánea.
Nesta visita puxeron o enfoque na curaduría da instalación, nas obras expostas e na propia organización do evento, como inspiración da programación da mostra pontevedresa, da man de Miguel Mallol, o comisario do pavillón español.
Xa pola tarde, a delegación pontevedresa coñeceu a colección Pinault, en Punta della Dogana. Esta visita enmárcase, tal e como informou o vicepresidente provincial, na "vontade de abrir a Bienal á participación privada".
Deste xeito, a colección contemporánea de François Pinault é clave para analizar como as coleccións privadas poden establecer colaboracións con institucións públicas, algo que xa aconteceu no Museo de Pontevedra coa mostra ‘A era das fábulas’.
Desde que a Deputación decidiu recuperar a Bienal de Arte de Pontevedra, que volverá na súa edición número 32 o vindeiro ano baixo o título "Volver a ser humanos… Ante a dor dos demais", Rafa Domínguez afirma que está a traballar para impulsar e captar o talento internacional.
En Venecia, a delegación da institución provincial está a establecer sinerxías para seguir traballando no proxecto de reactivación da Bienal de Pontevedra.
