O Mercado de Abastos de Pontevedra ofrecerá un encontro poético transfronteirizo este sábado 20 de setembro ás 19:00 horas.
A concelleira de Promoción da Cidade, Anabel Gulías, e o artista Antón Sobral presentaron esta mércores ‘Lonxa de Versos’, unha nova actividade integrada no programa de dinamización económica e comercial ‘A Pé de Rúa’, que nace con vocación de continuidade.
Durante a rolda de prensa, Gulías destacou que non hai "mellor xeito de poñer no mapa lugares estratéxicos para a economía local, como é o mercado, que a través da creación e da arte".
Neste sentido, sinalou a cultura, a lingua e a arte como "unha das pontes máis presentes" que unen a Galicia e Portugal.
O acto consistirá nun recital de poesía musicalizado que contará coa participación de catro creadores portugueses e catro galegos.
A achega portuguesa está formada por Joâo Pedro Azul (dramaturgo e editor de Vila do Conde), Aurelino Costa (recitador e compositor que colaborou con Jordi Savall), Elisabeth Oliveira (profesora e poeta) e Olga Santos (xornalista e fotógrafa).
Pola banda galega, estarán presentes Armando González López (cantautor e poeta ourensán), Carmen Quinteiro (poeta, profesora e perfomer), Xaime Toxo (presidente do Ateneo de Pontevedra, investigador e poeta) e Charo Valcárcel (poeta e novelista, veciña de Pontevedra).
Antón Sobral, promotor da iniciativa, agradeceu á concelleira Anabel Gulías por acoller o proxecto "e dicir que sí inmediatamente", así como a Elisabeth Oliveira, a quen definiu como "causante" da proposta ao ser quen lle plantexou a idea e contactou cos artistas portugueses.
Sobral perfilou brevemente a traxectoria de cada participante, sinalando a diversidade e a calidade das súas carreiras, e destacou que todos "recitan extraordinariamente ben".
O artista tamén sinalou que esta actividade serve, nun certo modo, para substituír "en pequeniño" o festival de poesía que viña organizando o Ateneo de Pontevedra e que este ano non se levará a cabo.
‘Lonxa de Versos’ busca ofrecer un pulo cultural ao espazo do mercado, un lugar que Sobral cualificou como "esteticamente unha marabilla", combinando a poesía coa música para dinamizar o centro histórico.
A entrada é libre.