Réquiem festivo na Illa das Esculturas: o Surfing the Lérez pecha a súa historia

O festival Surfing the Lérez concluíu este sábado na Illa das Esculturas de Pontevedra a última xornada da súa edición de 2026, marcada polo anuncio do seu cesamento definitivo tras quince anos de traxectoria.

Marcos Rivas, promotor do evento, comunicou que as razóns económicas, derivadas do incremento dos custos de produción, xunto a motivos de conciliación familiar, impiden manter a gratuidade da cita nos termos actuais.

A actividade da derradeira xornada nos catro puntos de directo comezou ao mediodía baixo condicións climatolóxicas de calor intensa, con rexistros que superaron os 32 graos e que reduciron a afluencia de público durante as primeiras horas da tarde en comparación con edicións precedentes.

Malia as condicións meteorolóxicas, o recinto recuperou a afluencia habitual co avance das horas mediante unha proposta distribuída en diferentes espazos coas actuacións de Familia Caamagno na apertura matinal, seguidos por Dani Cornes, Niños Bravos e o grupo The Rapants. A actuación da banda de Muros congregou a miles de asistentes antes do peche de madrugada a cargo de Estrogenuinas.

No Escenario Vibra Mahou ofrecíase unha programación continuada desde o mediodía coas propostas dA Gloria, Ninguén Patín, Cora Yako, Colectivo Da Silva, Camellos e a sesión de Señora DJ.

Os concertos no escenario O Chato foron os de Balteira, Alizza e Mad Foxes, para finalizar coa intervención de Portosanto.

E no Escenario Romaría Club soaba de forma exclusiva música mesturada con Eme DJ, A Yaya DJ, Carlos Crespo, Kris K DJ, Duendeneta Dilleis, Yago Rivas, Nida e Gorlitox.

A última xornada do festival desenvolveuse, como sempre, nunha contorna de convivencia interxeneracional, alternando os concertos coas zonas de sombra e descanso, con ambiente festivo e familiar, mentres no aire flotaba o desexo masivo de que esta edición do Surfing the Lérez non sexa, finalmente, a derradeira.